Pëllumb Pipero është kthyer gjatë muajve të epidemisë në një nga figurat më popullore dhe të dashura për shqiptarët falë këshillave të vazhdueshme që jep në daljet e tij publike.
Nga mesi i majit, infeksionisti tha se pas datës 18, kur ndodhi edhe hapja e madhe, do të kishte vetëm pak raste, dhe se në fund të qershorit do ishte fundi i virusit, por mesa duket ka rezultuar e kundërta.
Ditën e sotme, Pipero ka sqaruar deklaratën e tij, duke thënë se mendoi se nuk do dilte më në media dhe se shpëtonim nga Covid-19, por virusi është tekanjoz.
I ftuar në Ora News, mjeku tha se virusi është i paparashikueshëm dhe ka pasur raste të shtuara, kryesisht në vendet e Ballkanit.
Pipero shtoi se kjo është një situatë që duhet analizuar dhe sipas tij është e domosdoshme që të kemi kujdes për distancën fizike, maskën dhe dorezat për duart.
“Unë mbas datës 18 maj mendova që nuk do të dal më në televizor, mendova se nuk do të ketë më arsye për të dalë, së bashku me kolegët e mi. Unë e kam deklaruar që fundi i majit do të ketë rastet e fundit dhe qershori do të ketë raste sporadike dhe do të mbyllet në fund të qershorit, por kam thënë se do të jetë e vështirë për të bërë parashikime. Ky është një virus tekanjoz dhe me shumë të panjohura, mesa duket ka funksionuar edhe në rastin tonë, kryesisht në vendet Ballkanike, duke pasur raste të shtuara. Kjo është një situatë që duhet analizuar. Mendoj që është e domosdoshme që të kemi kujdes për distancën fizike, maskën dhe dorezat për duart”, tha Pipero.
Më herët ditën e sotme, duke marrë shkas nga rritja e rasteve të reja me Covid-19, kryeministri Edi Rama u është rikthyer daljeve në Facebook, ndonëse vetëm në fillim të muajit bëri daljen e tij të fundit online për epideminë.
Duke përmendur rritjen e numrit të infektuarve, Rama u ngriti pyetjen “nëse do të bëhemi njerëz” apo të rikthehet karantina?
Ky komunikim ishte një paralajmërim, ku kreu i qeverisë është kujdesur të thotë se nuk dëshiron që të rikthehen ndëshkimet për qytetarët apo bizneset, por nëse kjo situatë nuk do të ndryshojnë duke filluar që ditën e sotme, atëherë do të kthehemi pas, atëherë kur vendi ishte i mbyllur totalisht.
Ditët e fundit bilanci nga Covid-19 ka qenë alaramant, pasi Ministria e Shëndetësisë ka informuar për shifra rekord të infektuarish.
Ditën e sotme u shënua bilanci më i thellë nga fillimi i epidemisë, 44 raste të reja dhe në total numërohen 1385 të infektuar.
Sakaq, janë regjistruar edhe 2 vdekje dhe tashmë numri i viktimave nga Covid-19 ka shkuar në 35.
Ndërkohë numri i të shëruarve ka shkuar në 1001.
