Lajmi tronditës i bërë publik pak ditë më parë në “Top Channel”, u konfirmua ditën e djeshme edhe nga një djalë i cili ka jetuar në të njëjtën jetimore në Shkodër, së bashku me Adrianën.
Kjo e fundit, ka treguar në televizion të gjithë historinë tronditëse të jetës së saj, sesi ishte rritur në jetimoren e Shkodrës e sesi ishte abuzuar në moshën 12-vjeçare nga roja i jetimores për një kohë të gjatë.
Ditën e djeshme Ervis Zefi, djali që ka jetuar në të njëjtën jetimore në Shkodër së bashku me Adrianën, ka konfirmuar atë që ka rrëfyer ajo.
E ndërsa sot të tjera dëshmi tronditëse për abuzime seksuale dhe dhunë, vijnë nga fëmijët jetimë në jetimoren e Shkodrës.
Ndoi Rripa tha sot për emisionin “Shqipëria live” se ka jetuar në jetimore nga viti 2004 deri në 2013-n, ndërsa konfirmoi dëshmitë e Adriana Berishës dhe Ervis Zefit janë të vërteta për dhunën dhe përdhunimin
“I qëndroj pro deklaratave të tyre. Kam qenë person që jam dhunuar fizikisht nga roja i natës.
Ai më detyronte të pastroja banjat.
Nuk është ai që ka folur Adriana. Ai që më ka dhunuar mua ka qenë roja brenda institucionit, që flinte aty për të na ruajtur ne.
Kur e kundërshtoja që të mos pastroja, ai më godiste. Ne si fëmijë e kemi bërë punën e tyre”, shprehet ai.
Ai rrëfen se është dhunuar sistematikisht nga punonjës të jetimores dhe është goditur me hekura, dhe shkopinj, ndërsa kur vinte drejtori, të gjitha silleshin shumë mirë me fëmijët.
“Kam qenë 10-11 vjeç. Dhuna nuk ka qenë vetëm për një periudhë moshe, por gjithmonë.
Jam goditur shumë herë me hekura, shkopinj si nga kujdestaret femra ashtu edhe meshkuj.
Kur vinte drejtori, ato silleshin shumë mirë me ne”, ka vijuar Rripa.
Ndoi gjithashtu ka rrëfyer edhe një rast përdhunimi nga roja i institucionit të një vajzë 13-vjeçare.
Bëhet fjalë për një tjetër person që ka punuar në jetimore, dhe jo ai i akuzuar për përdhunimin e Adrianës:
“Personi qe me detyronte te pastroja banjat kishte marrëdhënie seksuale me nje vajzë 13 vjeçe. E kanë parë shumë veta.
Roja ka patur një dhome dhe aty e merrte atë vajzën.
Natën dëgjoja te bërtitura. Kur e mori vesh drejtori rojën e larguan nga puna. Kur e pyesnim ajo e mohonte se gjithë fëmijët e kishin frike rojën.
I gjithë stafi i Shtëpisë së Fëmijës e dinte qe roja përdhunonte”, tregoi Ndoi.
Ndoi shprehet se vajza asnjëherë nuk ka folur rreth kësaj ngjarje me të tjerët, pasi kishte frikë dhe e mohonte.
Adriana ishte e para nga ky institucion që rrëfeu se roja e kërcënonte me jetë nëse do t’i tregonte dikujt për veprimet e tij.
Po ashtu Adriana zbuloi se të gjitha vajzat e kësaj jetimoreje abuzoheshin seksualisht.
Akoma më tronditës ishte fakti që jo vetëm roja i shkollës i kishte përdhunuar, por edhe mësuesit apo kujdestarët, në bodrumin e shkollës.
Rrëfimi i saj ka nxitur edhe të tjerë persona të rrëfehen, të cilët kanë jetuar në këtë jetimore dhe që janë abuzuar e keqtrajtuar në forma nga më çnjerëzoret.
Urojmë që drejtësia të vihet në vend dhe që të gjithë personat të cilët kanë bërë veprime që dënohen me ligj, të vihen para drejtësisë.
