Ka përfunduar takimi i kryeministrit Edi Rama me përfaqësuesit e opozitës së re për Reformën Zgjedhore.
Fokusi i këtij takimi ishte Reforma Zgjedhore, pasi opozita ka deklaruar se nuk do ta votojë marrëveshjen e 5 qershorit në Parlament pa u plotësuar 2 kushtet që kanë, depolitizomi i administratës Zgjedhore dhe ndryshimi i sistemit zgjedhor.
Në takim ishin të pranishëm tre kryetarët e grupeve parlamentare të opozitës, Myslim Murrizi, Nimet Musai dhe Edmond Stojku, të cilët mëngjesin e sotëm takuan edhe kryeparlamentarin Gramoz Ruçi për mëse një orë, por nuk u arrit një dakordësi.
Ata paralajmëruan se do të braktisnin të gjitha komisionet parlamentare deri në realizimin e kërkesave të tyre dhe i kishin lënë afat kreut të qeverisë deri mbrëmjen e sotme në 00:00.
Gjithashtu, e pranishme ishte edhe deputetja Rudina Hajdari, e cila në fillim të mbledhjes foli me gjuhën e ambasadores së SHBA-së, Yuri Kim, duke thënë se “topi është në fushën e kryeministrit Edi Rama”.
Kreu i grupit demokrat në parlament, Muslim Murrizi në përfundim të mbledhjes me kryeministrin Rama tha se opozita e re nuk do të tërhiqet nga kërkesat e saj.
Ndërkohë, Murrizi ka lënë të nënkuptuar se ka pasur përpjekje nga ana e opozitës jashtëparlamentare për të “trafikuar votat”, siç ai i i quan për Reformën Zgjedhore.
“Nuk zgjati aq shumë se ne nuk jemi deputet apo pjesë ne tavolinë që mund të gënjeni, ta harroj Rama që mund të kalohet një sistem Zgjedhor me vota të trafikuara, nuk tërhiqemi nga kërkesat tona dhe do t’i institucionalizojë. Trafikimi është bërë edhe aset i partive të tjera të Këshillit Politik që kanë interes që kjo Reformë të kalojë. Kanë gatuar gjellë qensh prej 30 vjetësh, do të ketë radikalizim. Ne ikëm që Rama të vite brenda 48 orësh. Ne në Komision do vendosim kushte dhe sanksione në interes të shqiptarëve. Nuk ka fazë të dytë dhe as fazë të tretë. Javën tjetër qe do të mblidhet komisioni ne do të kemi propozime konkrete për ndryshimin e sistemit. Keni merakun që luajmë për veten tonë, pyesni Ramën, Lulin dhe Monën. Ne nuk hamë me lugë të papastruar nga cila do gjelle”, tha Murrizi.
Nga ana tjetër, Rama pas takimit me opozitën parlamentare u shpreh se reforma duhej të ishte bërë më parë duke garantuar marrëveshjen për kodin.
Më tej ai theksoi se me rëndësi është që të vazhdohet diskutimi, ndërsa shtoi se me këtë kod nuk shkohet dot në zgjedhje pasi sipas tij duhen bërë ndërhyrje për të garantuar instancën e ankimimit.
“Akuzat ishin në bllok për ata që janë jashtë por edhe në adresën tonë dhe u sigurova se ne nuk do shkojmë në rrugën e një zgjidhje ku thjesht do kërkojmë aritmetikën por në rrugën e diskutimit për të krijuar kushtet e një dakordësie dhe në asnjë mënyrë nuk do të përdoret Sigurisht që ne këtu jetojmë dhe qasja për të gjetur një marrëveshje lehtësuese dhe qetësuese për kryetarin e opozitës kishte synimin që të gjithë të jenë të përfshirë dhe të jenë të gatshëm të hyjnë në ballafaqim me zgjedhësit. Ka një opinion të gjerë që mendon se hapja e listave ka një efekt çudibërës por unë nuk e besoj këtë sepse mendoj që nuk ka sistem më demokratik se tjetri.Këta njerëz që janë në parlament vijojnë nga listat e partisë demokratike. Kjo do të ishte si të thuash adresa e votës. Unë e kuptoj shumë mirë që diskutimi është legjitim, ja u kujtova zotërinjve që kjo reformë duhej bërë më parë, me dy shkallë, duhej fillimisht marrëveshja për kodin. Me këtë kod nuk shkojmë dot në zgjedhje sepse sidoqoftë ka nevojë për disa ndërhyrje ku më kryesorja është ndërhyrja që minimumi duhet të sigurojmë instancën e animimit.
Kurse, deputeti i opozitës, Edmond Stojku, ka thënë sot se opozita nuk ka bërë bojkot, por thjesht nuk kanë marrë pjesë në Konferencën e Kryetarëve.
Stojku tha se ai njoh shqipen e Gjon Buzukut, dhe shtoi se opozita nuk ka bojkotuar asgjë.
Stojku: Bojkot është bojkot, ne nuk kemi bërë bojkot kemi marrë pjesë.
Gazetarja: Po bojkot dhe nuk merr pjesë janë e njëjta gjë.
Stojku: Unë njof shqipen e Gjon Buzukut.
Këto deklarata kanë shkaktuar të qeshura tek gazetarët e pranishëm, por dhe vetë deputetët e opozitës nuk e ruajtën dot seriozitetit.
Më pas Stojku tha se opozita parlamentare ka nisur një proces takimesh.
