Mbrëmjen e kësaj të marte policia e Elbasanit ka realizuar një ndjekje si nëpër filma në rrugët e qytetit, konkretisht në Bradashesh në hyrje të autostradës Elbasan-Tiranë.
Kjo pasi një mjet tip “Seat”, ngjyrë e bardhë me targa AA 452 VY, me dy persona të grup moshës 25-30 po udhëtonte me një shpejtësi ‘skëterrë’ me një mjet të marrë me qira, në momentin që janë vënë re nga Policia që po patrullonte, raporton ABC News.
Pas ndjekjes, efektivët u kanë bërë shenjë ndalimi të rinjve, ndërkohë që ata kanë vijuar të ecnin me shpejtësi të lartë, dhe kjo ka bërë që efektivët të kërkonin përforcime.
Në këtë ndjekje janë përfshirë forca të shumta Police, rreth 30 efektivë, të cilët kanë arritur të kapin dy të rinjtë të cilët i kanë shoqëruar në komisariatin e Policisë Elbasan.
Deri tani nuk bëhen me dije detaje të tjera për dy të rinjtë e shoqëruar.
