Atentati ndaj Ardian Çapjas ka shkaktuar një bujë të madhe në media, teksa autorët ende nuk janë identifikuar, megjithatë duket se edhe pak ka mbetur.
Së fundmi, Dosja.al ka zbardhur detaje të reja mbi skemën që u ndërtua në Elbasan, mëngjesin e të hënës, duke raportuar se janë sekuestruar të gjitha kamerat e sigurisë rreth e qark vendit të ngjarjes, ndërkohë që janë marrë në pyetje edhe 28 persona, që mendohet se janë në dijeni, apo kanë parë ndonjë gjë në lidhje me atentatorët.
Pikërisht nga vëzhgimi i kamerave të sigurisë është vënë re se disa nga atentatorët kanë pasur maska plastike (të ngjashme me ato që vendosen në festën e Halloween), e të tjerët mbanin kapele e maska të zeza.
Snajperi dhe dy vëzhguesit kanë vrapuar menjëherë drejt saj sapo objektivi është qëlluar, duke besuar se e kanë lënë të vdekur dhe me ndihmën e një fuoristrade janë larguar nga vendi i ngjarjes.
Këto filmime dhe dëshmitë e mbledhura nga deklarimet e personave që janë marrë në pyetje, pritet të zbardhin më tepër detaje.
Nga ana tjetër, Ardian Çapja vijon të qëndrojnë në Spitalin e Traumës, ende në rrezik për jetën, por mbrëmjen e të hënës ka dhënë dëshminë e parë për Policinë, duke mohuar atentatin, pasi shprehet se është rrëzuar mbi një hekur që i ka shpuar tejpërtej.
“Nuk guxon njeri të më vrasë në shtëpinë time. Pasi u rrëzova nga banesa në shpatull më ka hyrë një hekur, prandaj ngeli edhe plaga. Ju po mashtroni”, u është drejtuar Ardian Çapja oficerëve që e pyetën për ngjarjen.
Mirëpo, ekzaminimet flasin për një plumb që i ka kaluar fare pranë zemrës dhe në shtëpinë e Capjas nuk kanë gjetur hekurin që ai pretendon se e ka shpuar.
Mëngjesin e djeshëm Elbasani do zgjohej me një ngjarje të rëndë, pasi Ardian Çapja, koka e familjes Çapja dhe pronari i një sërë bizneseve ka rënë pre për herë të tretë e një atentati.
Ai është qëlluar me snajper, por arriti të mbijetonte, duke u plagosur në shpatullë dhe këmbë, teksa menjëherë u transportua drejt Spitalit të Traumës në kryeqytet.
Mësohet se një person i veshur si punonjës në fushën e ndërtimit, me kominoshe që përdorin punonjësit e llaçit, ka zbritur nga një automjet i llojit “Range Rover”, i Policisë dhe ka vrapuar drejt banesës së Çapjave, ku ka qëndruar për më shumë se një orë.
Nga ana tjetër, pas atentatit, mësohet se janë angazhuar të gjithë njerëzit e Çapjave dhe janë vënë në ndjekje të autorëve, ndërsa disa prej tyre bllokuan rrugën kryesore në dalje të Krastës dhe pritën momentin kur me ‘shpejtësi skëterrë’ kaloi mjeti i atentatorëve.
I plagosur ka ngelur edhe një zjarrfikës i cili ka tentuar të shuajë flakët tek makina e djegur e autorëve, por aty është përballur me shpërthimin e disa fishekëve.
Edhe pse plumbi i kaloi pak centimatra pranë zemrës dhe një tjetër e mori në këmbë, Çapja ia doli të mbijetojë por është në rrezik për jetën.
