Mbrëmjen e sotme emisioni investigativ “Fiks Fare” ka denoncuar një punonjës të Policisë së Shtetit, me detyrë në pikën e kalimit kufitar në Kakavijë, Gjirokastër, i cili u ka kërkuar disa qytetarëve marrëdhënie intime në këmbim të kalimit të tyre ilegal drejt Greqisë.
Emisioni ka regjistruar me video se punonjësi ka lidhje të forta me grupet kriminale që trafikojnë njerëz për në Greqi dhe duke shfrytëzuar këto lidhje, punonjësi u kërkon favore këtyre shtetasve.
Pas zbulimit të skandalit, Policia e Shtetit ka marrë masa drastike në drejtim të tij, duke e përjashtuar menjëherë nga radhët e forcave të rendit.
Në një njoftim për mediat, Policia falenderon median dhe qytetarët dhe i inkurajon ata që të denoncojnë çdo abuzim me detyrën, nga punonjësit e Policisë, duke i garantuar reagim të menjëhershëm dhe të paanshëm.
Policia e Shtetit:
Duke marrë shkas nga transmetimi në një emision investigativ, i shkeljes së rëndë të kryer nga punonjësi i Policisë P. Ç., trup shërbimi në Drejtorinë Vendore për Kufirin dhe Migracionin Gjirokastër, Drejtoria e Standardeve Profesionale në Policinë e Shtetit bëri përjashtimin e menjëhershëm të këtij punonjësi policie nga radhët e Policisë së Shtetit.
Policia e Shtetit falënderon median dhe qytetarët dhe i inkurajon ata që të denoncojnë çdo abuzim me detyrën, nga punonjësit e Policisë, duke i garantuar reagim të menjëhershëm dhe të paanshëm.
