Teksa të gjithë i janë rikthyer jetës normale duke bashkëjetuar me Covid-19, gjendja në Maqedoninë e Veriut nuk duket aspak e mirë, teksa vijon të ketë shifra të larta të viktimave dhe të të infektuarve me Covid-19.
Gjatë 24 orëve të fundit janë regjistruar 125 raste të reja, si dhe kanë ndërruar jetë dy persona, njëri nga Prilepi dhe tjetri nga Strumica.
Sipas Ministrisë së Shëndetësisë, numri më i lartë është në Shkup, me 46 të infektuar, pasuar nga Kumanova me 19 të infektuar, Shtipi 17, Tetova me 16 raste, Struga 7 Gostivari 6, Ohër 5, Veles 3 raste të reja, Negotinë 2 të infektuar, ndërsa Manastir, Koçanë, Dellçevë dhe Prilep nga 1 rast të ri.
Sipas një analize të Institutit të Shëndetit Publik të Maqedonisë së Veriut, numri më i madh i rasteve të fundit me Covid-19 i takon grup-moshës midis 30-39 vjet.
Në Maqedoninë e Veriut ka ndalime masive të lëvizjes për shkak të shpërthimit të një vale të re të virusit, teksa shifra rekord e së premtes me 177 raste të reja të regjistruara, pasohet nga një tjetër 125 infektime të shtunën.
Qeveria e Maqedonisë së Veriut ka reaguar ndërkohë duke vendosur ndalim qarkullimi 80 orësh për qytetet më të prekura, teksa që të enjten në mbrëmje u vendos ndalimi i qarkullimi, i cili përfundon në orën 5 të mëngjesit të të hënës.
Ekspertët e lidhin shpërthimin e valës së re të pandemisë me rastet e reja në një fabrikë ëmbëlsirash, si edhe me takimet familjare përgjatë festës së Bajramit pas përfundimit të muajit të Ramazanit.
90% e rasteve të reja vijnë nga 15 familje, ka thënë ministri i Shëndetësisë, Venko Felipce të premten.
