Pas një viti e gjysmë sot është bërë i mundur arrestimi i një 44-vjeçari, i shpallur në kërkim, për dhunë në familje dhe pengim të vendimit të gjykatës.
Pas tre ditësh kërkimi intensiv në pyllin e Kurbneshit, Policia ka bërë të mundur prangosjen e Alban Buraku dhe ka gjetur edhe të miturin 8 vjeçar, i cili ishte marrë nga 44-vjeçari, duke shkelur vendimin e Gjykatës.
Ai është në gjendje të mirë shëndetësore dhe për momentin po trajtohet me psikolog në Policinë e Lezhës.
Buraku pasi kishte ushtruar dhunë fizike dhe psikologjike ndaj bashkëshortes, kishte marrë djalin e tyre të mitur dhe ishte larguar.
Materialet shtesë do t’i kalojnë Prokurorisë së Rrethit Gjyqësor Kurbin, për veprime të mëtejshme.
Pas këtij lajmi ka reaguar edhe ministri i Brendshëm Sandër Lleshaj, i cili ka shkruar në rrjetet sociale se sot përfundoi kalvari i rëndë i këtij fëmije që duhet të shërbejë si një thirrje për më shumë ndjeshmëri shoqërore kundër dhunës, burrëri e përgjegjësi.
Ai shton se vendi i fëmijëve është në familje dhe në shkollë.
NJOFTIMI I PLOTË
Strukturat policore të DVP Lezhë dhe shërbimet e Komisariatit Mirditë, pas shumë kontrollesh të zhvilluara për gati një vit e gjysmë, bazuar edhe në informacionet e marra në rrugë operative bënë të lokalizimin e shtetasit të shpallur në kërkim.
Mbi bazën e këtyre informacioneve u organizua dhe u finalizua operacioni policor “Kurbneshi”, në kuadër të të cilit pas rreth 72 orësh kërkime në fshat dhe në pyllin e Kurbneshit, u bë e mundur gjetja dhe prangosja e shtetasit A. B., i shpallur në kërkim, pasi Gjykata e Shkallës së Parë Lezhë, me vendimin nr. 4, datë 05.01.2019, i ka caktuar masën e sigurisë “Arrest më burg”, për veprat penale “Dhuna në familje”, “Pengime për ekzekutimin e vendimeve të Gjykatës” dhe “Veprime në kundërshtim me vendimin e Gjykatës”.
Ky shtetas, pasi kishte ushtruar dhunë fizike dhe psikologjike ndaj bashkëshortes L. B., kishte marrë dhe djalin e tyre të mitur, në kundërshtim me vendim e Gjykatës.
Prej nëntorit të vitit 2018, Policia e Qarkut Lezhë ka vazhduar punën në mënyrë të pandërprerë për lokalizimin, kapjen dhe vendosjen para përgjegjësisë ligjore të shtetasit A. B. Përveç veprimeve procedurale, forcat policore, që nga data kur është shpallur në kërkim, në mënyrë të pandërprerë kanë vlerësuar me prioritet çdo informacion që jepej për vendndodhjen e tij, duke ushtruar kontrolle, por pa arritur të gjendej personi i kërkuar.
Materialet shtesë në ngarkim të shtetasit A. B., do t’i kalojnë Prokurorisë së Rrethit Gjyqësor Kurbin, për veprime të mëtejshme.
