Kur kanë mbetur edhe pak ditë nga hapja e plazheve publike, kryeministri Edi Rama përmes një postimi në Facebook ka dhënë detaje se si do të funksionojnë plazhet.
Ai shkruan se aplikimi për hapësirën e plazhit nga subjektet do të bëhet në e-Albania, duke marrë përgjegjësi për zbatimin e rregullave dhe mos shmangur asnjë detyrim ndaj qytetarëve, bashkisë, shtetit.
Sipas kryeministrit sistemi i ri siguron transparencë dhe shmang zvarritjet, teksa zotohet se ka zero kosto, zero ecejake, zero rryshfet.
“Subjektet akomoduese apo shërbimi duhet të aplikojnë në e-Albania për marrjen në përdorim të hapësirës së plazhit përgjatë gjithë sezonit 2020, duke marrë përgjegjësi për zbatimin e rregullave dhe mosshmangur asnjë detyrim ndaj qytetarëve, bashkisë, shtetit. Aplikimi është i thjeshtë dhe mund të bëhet edhe nga telefoni. Një sistem i ri këtë vit, që siguron transparencë, shmang zvarritjet po edhe allishverishet e të shkuarës dhe garanton paprekshmërinë e plazheve publike,”-shkruan Rama në postimin e tij.
https://www.facebook.com/138734771522/posts/10157830511531523/
Për shkak të pandemisë së koronavirusi, hapja e sezonit turistik ka hasur në probleme të shumta, teksa me uljen e rasteve të reja, vendet kanë vendosur që të hapin kufijtë në mënyrë që industria e turizmit të ‘rimëkëmbë’ ekonomitë e dëmtuara nga pandemia.
Përveç Shqipërisë, kufijtë për turistët e huaj i kanë hapur edhe vendet e tjera të Ballkanit, por këtë vit plazhi do të zhvillohet nën masa të reja sigurie, një ndër to edhe hapësira e çadrave larg njëra-tjetrës për të shmangur afërsinë.
