Tashmë ka shkuar në 475 numri i të prekurve nga COVID-19 në vendin tonë, pasi gjatë 24 orëve të fundit kurba ka rënë sërish dhe janë shënuar 8 raste të reja: 6 në Tiranë, 1 në Shkodër dhe 1 në Kukës.
Prej ditësh kryeministri Rama ka paralajmëruar lehtësimin e masave të marra në kuadër të parandalimit të përhapjes së koronavirusit, pasi sipas tij kurba e ka kaluar pikun dhe tashmë po shkon drejt rënies.
Së fundmi, kreu i qeverisë me anë të një reagimi në Facebook, ka paralajmëruar se brenda 10 ditëve mund të nis hapja e shumë aktiviteteve duke ndjekur modelin e Austrisë, që sipas tij ka një hapje të ngjashme në Shqipërinë, por më të avancuar në kohë me rreth 10 ditë.
Më tej, Rama citon edhe fjalët e kancelarit Sebastian Kruz, i cili u shpreh: “Aq liri sa të jetë e mundur, aq shtrëngime sa të jetë e nevojshme”.
“ AUSTRIA KA NJË PLAN HAPJEJE TË NGJASHËM ME TONIN DHE MË TË AVANCUAR NË KOHË ME RRETH 10 DITË. JA ÇFARË KA SHKRUAR PARA PAK MINUTASH NË TWITTER KANCELARI AUSTRIAK: “Qasja jonë në muajt e ardhshëm do të jetë e qartë: aq liri sa të jetë e mundur, aq shtrëngime sa të jetë e nevojshme. Nëse numrat do të lëvizin në drejtimin e gabuar, ne do përdorim frenat e emergjencës që do të jenë gati në çdo moment”. FIKS”, shkruan Rama.
https://www.facebook.com/138734771522/posts/10157641913781523/
Ditën e sotme kancelari i Austrisë, Sebastian Kruz, njoftoi njoftoi në një konferencë për shtyp se qeveria e tij ka vendosur që të marrë disa masa për normalizimin e situatës, teksa bëri me dije se do ketë ketë shumë lehtësim për biznesin, por qytetarët do vijojnë të punojnë dhe nga shtëpia.
Sot shteti austriak ka filluar hapjen me masa strikte të dyqaneve të vogla por në maj planifikon të hapë edhe qendrat tregtare.
Ditën e sotme edhe OBSH publikoi 6 kriteret që duhet të plotësojë çdo vend para lehtësimit të masave:
- Transmetimi i virusit është i kontrolluar;
- Kapacitetet e sistemit shëndetësor janë të vendosura për të testuar, izoluar dhe trajtuar çdo rast dhe gjurmuar çdo kontakt;
- Rreziqet e shpërthimit minimizohen në ambiente të veçanta si institucionet shëndetësore dhe shtëpitë e pleqve;
- Masat parandaluese janë vendosur në vendet e punës, shkollat dhe vendet e tjera thelbësore;
- Rreziqet e importimit mund të menaxhohen;
- Komunitetet janë plotësisht të edukuar, të angazhuar dhe të fuqizuar për t’u përshtatur me normat e reja.
