Ndonëse Koreja e Jugut e përballoi shumë mirë situatën e krijuar nga koronavirusi, problemet në vend janë rishfaqur teksa deri tani numëron 10,537 të infektuar dhe 217 viktima.
Ditën e sotme mediat e huaja raportojnë se në Korenë e Jugut, të paktën 116 persona që ishin konsideruar të shëruar kanë rezultuar sërish pozitivë me koronavirus.
Këtë të hënë u regjistruan vetëm 25 raste të reja me Covid-19, por rritja e rasteve të riaktivizuara ka bërë që të ngrihet një shqetësim tjetër, teksa zyrtarët ende po hetojnë shkakun e riaktivizimit e rasteve.
Sipas Jeong Eun-kyeong, drejtor i Qendrave Koreane për Kontrollin dhe Parandalimin e Sëmundjeve, virusi mund të jetë riaktivizuar dhe në këtë mënyrë sipas tij mund të bëhet fjalë për një riaktivizim të virusit dhe jo ri-infektim.
Nga ana tjetër, ekspertë të tjerë mendojnë se shkaku i kësaj situate janë testet e pasakta, të cilët nxjerrin përgjigje të gabuara, por gjithsesi shtojnë se virusi mund të vazhdojë të jetë në trupin e pacientëve, por nuk është problem as për ta as për të tjerët.
Koreja e Jugut planifikon të dërgojë 600,000 kuti testimi për koronavirus në Shtetet e Bashkuara, të martën në dërgesën e parë të tillë pas një kërkese nga Presidenti i SHBA-ve, Donald Trump.
