Prej ditësh mes qeverisë dhe opozitës është ndezur debati rreth testimit masiv të popullsisë për gjurmimin e rasteve me koronavirus.
Partia Demokratike i ka kërkuar kryeministrit Rama të bëj testim masiv sepse kjo do frenonte përhapjen e COVID-19, si në disa vende të botës, kurse Rama nga ana tjetër thotë se nuk e sheh të arsyeshme diçka të tillë dhe se po vepron në përputhje me kërkesat e Task-Forcës.
Ditën e sotme kreu i OBSH në Tiranë, Raul Gonzales, në një intervistë për Report Tv foli gjerë e gjatë rreth situatës në vendin tonë, ku ndër të tjera u ndal edhe tek testimi, duke u shprehur se strategjia që ka ndjekur Shqipëria ka qenë efektive dhe se nuk ka standard që tregon se sa është numri i mjaftueshëm i testeve.
“Nuk ka një standard që tregon sa është numri i mjaftueshëm i testimeve. Cdo vend duhet të përshtasë strategjinë e testimit. Numri i testeve në Shqipëri duket se është i mjaftueshëm për të kontrolluar epideminë sepse ne po shohin që epidemia është nën kontroll. Ajo cka nuk mund të fshihet asnjëherë është numri i personave që vdesin dhe numri i personave që janë në terapi intensive dhe është një indikator i mirë për përhapjen e infeksionit. Në Shqipëri ka shumë pak persona në terapi intensive fatmirësisht dhe shpresojmë që shumë pak njerëz do humbin jetën pra epidemia është nën kontroll. Ne shohim që strategjia e testeve në Shqipëri për rastet e dyshuara dhe gjurmimin e kontakteve ka qenë shumë efektive. Në këtë pikëpamje mund të themi që strategjia e testimeve po jep rezultatet që priteshin”.
Një tjetër çështje shumë e rëndësishme, që ka ngritur polemika të shumta në të gjitha shtetet është edhe përdorimi i maskave.
Vetë Organizata Botërore e Shëndetësisë nuk ka qenë e vendosur në një përfundim, duke bërë deklarata kontradiktore, herë duke u shprehur se maskat duhen përdorur dhe herë duke thënë se ato nuk ndihmojnë ndaj koronavirusit.
Mjekët në vendin tonë kanë deklaruar se maskat duhet të përdoren nga personat e infektuar, kurse, Raul Gonzalez listoi disa kategori që duhet të përdorin maska.
“Edhe kjo është një çështje që ka hapur shumë debate në botë. Shoqëri të ndryshme kanë qasje të ndryshme ndaj përdorimit të maskave. Shoqëritë aziatike i përdorin maskat gjatë gjithë kohës, edhe para situatës së covid-19, për shembull për shkak të ndotjes. Ne kemi rekomandime të sakta se kush duhet të përdorë patjetër maska dhe cfarë lloj maske. Këto janë punonjësit e shëndetësisë që janë në vijën e parë duke trajtuar persona që mund të jetë të infektuar meCOVID-19. Sigurisht që duhet të përdorin maska me kualitet të mirë. Sigurisht edhe policët por dhe punonjësit në supermarkete janë të riskuar dhe duhet të përdorin maska. Në rastet që njerëzit që po përdorin maskat janë të infektuar dhe nuk kanë simptoma apo shumë pak simptoma, kjo do të mbronte të tjerët. Po ta shohim në këtë kënd do të ishte e vlefshme. Kjo është arsyeja që disa vende po rekomandojmë përdorimin në masë të maskave. Rekomandimi OBSH është që ju lutem të sigurohemi që punonjësit e shëndetësisë të kenë maska dhe të kemi stokun gati për t’ia siguruar këtyre personave. Nëse do të ketë përdorim në masë të maskave ju luteni ndani të dhënat në termat e impaktit të epidemisë.”- tha ai.
Këtë të premte kryeministri Rama paralajmëroi lehtësimin e masave të marra në kuadër të situatës të krijuar nga COVID-19, duke u mbështetur dhe në kurbën e koronavirusit në Shqipëri .
Gonzales tha se masat e marra nga qeveria kanë mbrojtur popullin shqiptar, por çdo hap i ri në lehtësimin e masave duhet bërë me shumë kujdes.
Lidhur me krijimin e vaksinës për COVID-19, Gonzalez u shpreh se do të duhet të prodhohet sasia e nevojshme, por nuk do të jetë gati më parë se një vit apo një vit e gjysëm, teksa foli për një valë të dytë të virusit që është e lidhur me mënyrën se si do të menaxhohet izolimi.
