Orges Bilbili, një nga autorët e masakrës së Lushnjes dhe pjesë e bandës së Lushnjes u arrestua mesditën e sotme, në zonën e Xhamllikut.
Një efektiv i policisë pa Bilbilin duke ecur në këtë zonë dhe i është afruar duke i kërkuar kartën e identitetit.
Mirëpo, në këtë moment ai ka vrapuar dhe ka nxjerrë nga çanta një armë zjarri, teksa polici e ka paralajmëruar të ndalojë, por Bilbili i ka thënë se do e qëllojë nëse nuk largohet.
Efektivi ka qëlluar një herë në ajër, më pas e ka plagosur në këmbë dhe po ashtu është plagosur aksidentalisht edhe një grua.
Të dy të plagosurit ndodhen jashtë rrezikut për jetën në spital.
Mirëpo, 6 orë pas arrestimit të Bilbilit, Policia e Shtetit kanë zbarkuar sërish në zonën e Xhamllikut dhe siç shihet edhe nga pamjet, automjetet e policisë kanë rrethuar pallatin, ku mësohet se fshihej prej kohësh autori i masakrës së Lushnjes.
Sipas Dosja.al, policia tashmë është vënë në kërkim të bashkëpunëtorit të Bilbilit, Laer Haxhiut, i cili dyshohet se fshihet në të njëjtën zonë, teksa deri më tani nga kontrollet e ushtruara mësohet se janë gjetur disa prova materiale.
Orges Bilbili akuzohet për vrasjen në bashkëpunim me Laert Haxhiun të Besmir Hidës, ngjarje kjo e ndodhur në tetor të 2019-ës në një lokal në qendër të Lushnjes.
Gjithashtu, Bilbili rezulton se është dënuar me 7 vite e 4 muaj burg për trafik narkotikës dhe njëkohësisht ka dyshime se ai është përfshirë në atentatin ku mbetën të plagosur nipi i Aldo Bares, Xhulio Shkurti dhe Sajmo Xhelili.
Orges Bilbili akuzohet edhe si bashkëpunëtor i pilotit italian Gorgio Riformato, avioni i të cilit ngeci në bregdetin e Divjakës, ndërsa po përgatitej që të trafikonte lëndë narkotike nga Shqipëria në Itali.
