Pas 16 orë bisedimesh, ministrat e financave të Eurozonës kanë rënë dakord për të zhbllokuar fondin prej 500 miliardë eurosh,që do t’i vijë në ndihmë vendeve më të prekura nga koronavirusi.
Italia dhe Spanja tashmë do të kenë mundësi të gjenerojnë fonde nëpërmjet tregjeve financiare europiane, ose të quajtur ndryshe “coronabonds”.
Ministri holandez i financave, Wopke Hoestra, u shpreh se koronabondi do të shoqërohet me shtrëngime të forta ekonomike, nëse paratë nuk përdoren vetëm për të kaluar krizën, por edhe për ekonominë më gjerë.
“Mekanizmi i stabilitetit i Europës mund të gjenerojë ndihmë financiare për shtetet pa kushte, nëse bëhet fjalë për shpenzime mjekësore. Fondi mund të përdoret edhe për qëllime ekonomike, por do të shoqërohet me kushte. Kjo është e ndershme dhe e arsyeshme”, tha Hoestra.
Gjithashtu gjatë mbledhjes u arrit edhe një marrëveshje për lëvrimin e 100 miliardë eurove, në mënyrë që kompanitë europiane të paguajnë punëtorët, të cilët kanë reduktuar orët e punës për shkak të pandemisë.
Pak përpara marrëveshjes, kryeministri italian, Giuseppe Conte e vuri nën presion të madhe BE-në.
“Është një sfidë e madhe për ekzistencën e Europës. Nëse Europa dështon që të gjejë një zgjidhje për sfidën më të madhe që nga Lufta e Dytë Botërore, jo vetëm italianët, por edhe qytetarët europianë, do të jenë thellësisht të zhgënjyer”, u shpreh Conte.
Ndërkohë organizatori i Samitit, Mario Centeno, i cili është gjithashtu Ministër Financash në Portugali dhe president i Eurozonës, tha: “Ne ose mbytemi së bashku, ose lundrojmë së bashku”.
Negociatat mes vendeve të BE për të gjetur një zgjidhje ekonomike për vendet e prekura nga COVID-19, provuan edhe një herë ndarjet e mëdha mes jugut dhe veriut të Europës.
