Duket se situata e jashtëzakonshme si pasojë e koronavirusit përtej Adriatikut do vijojë, pasi bilanci i viktimave dhe të infektuarve nuk po sheh përmirësim.
Departamenti i Mbrojtjes Civile në Itali ka bërë publike shifrat e reja të të prekurve dhe viktimave të shkaktuara nga koronavirusi në Itali dhe në 24 orët e fundit, janë regjistruar 766 viktima dhe numri total i të vdekurve në vend shkon në 14,681.
Po ashtu, janë identifikuar 4,585 raste të reja me koronavirus, duke e çuar numrin total të të prekurve në 119,827 persona.
Itali mbetet në vendin e parë për numrin më të madh të viktimave në botë dhe e dyta për numrin e të infektuarve, pas SHBA-së me 258,100 të infektuar.
Në tre ditët e fundit, kurba e epidemisë në Itali ka mbajtur të njejtin trend, numri i të infektuarve vjen drejt uljes ndërsa numri i viktimave drejt rritjes.
Sakaq, ka shkuar në 73 numri i mjekëve që kanë ndërruar jetë si pasojë e COVID-19 në Itali, pasi së fundmi dy mjekë të tjerë kanë ndërruar jetë dhe sipas raportimeve të mediave vendase, dy mjekët ishin njëri kardiolog, ndërsa tjetri mjek i përgjithshëm.
Në total numri i punonjësve shëndetësorë të infektuar deri tani ka tejkaluar shifrën e 10,000 rasteve, nga të cilët rreth 20% janë mjekë.
Kujtojmë se në Itali, në Bergamo, ndodhen edhe 10 mjekë e 20 infermierë shqiptarë, që kanë shkuar në ndihmë të kolegëve në këtë situatë të jashtëzakonshme.
