Deri tani COVID-19 ka marrë 49,295 jetë njerëzish dhe ka infektuar 966,939 persona, teksa Europa dhe Shtetet e Bashkuara të Amerikës po kalojnë një periudhë tepër të vështirë.
Aktualisht, Italia është vendi me numrin më të lartë të viktimave, pasi 13,915 kanë humbur jetën, ndërsa SHBA brenda pak ditësh u bë vendi me numrin më të lartë të të infektuarve, duke numëruar 217, 661 të prekur.
Sipas statistikave fillestar, virusi godiste më shumë të moshuarit dhe të sëmurët kronikë dhe kjo bëri që të rinjtë ta anashkalonin atë.
Mirëpo, me përparimin e virusit është vënë re se ai nuk pyet për moshë, pasi ka patur raste kur të rinjtë, apo edhe fëmijët kanë humbur jetën.
Së fundmi, Organizata Botërore e Shëndetësisë u ka bërë edhe një herë thirrje të rinjve që që të gjithë të kenë kujdes nga koronavirusi dhe të largojnë steriotipin se janë të paprekshëm.
Sekretari i Përgjithshëm i OBSH-së për Europën Hans Clugge tha në një konference javore për shtyp:
“Ideja që COVID-19 prek vetëm të moshuarit është e gabuar. Mosha nuk është i vetmi faktor rreziku për të pasur një formë serioze të sëmundjes…Gjithsesi, ata që janë të moshuar dhe kanë shëndet të mirë, janë më pak të rrezikuar. Ka pasur njerëz mbi 100-vjeç që janë shtruar në spital dhe janë shëruar plotësisht.”
Për Klugge, higjiena është esenciale për çdo moshë.
“Edhe pse thuhet gjerësisht se më të rrezikuarit nga koronavirusi janë të moshuarit dhe personat me sëmundje kronike, deri më tani në botë janë raportuar raste fatale edhe mes fëmijëve, adoleshentëve dhe të rinjve.
Në Europë, viktima më e re në moshë është një djalë 12-vjeçar nga Belgjika ndërsa në SHBA, një fëmijë 6-javësh humbi jetën si pasojë e koronavirusit.”
