Mbrëmjen e sotme ministrja e Financave dhe Ekonomisë Anila Denaj, e ftuar në ‘Open’ deklaroi se janë rreth 60 mijë punonjës dhe 30 mijë biznese që pritet të përfitojnë nga e ashtuquajtura “paga e luftës” që qeveria do të japë për t’ju ardhur në ndihmë për shkak të situatës së krijuar nga koronavirusi.
“Nga llogaritjet tona rezultojnë se kemi rreth 60 mijë punonjës që do ta përfitojnë pagën e luftës. Ndërsa nga niptet active kemi 30 mijë biznese. Aplikimi duhet bërë nga bizneset por paga do u kalojë në llogaritë e punonjësve”, u shpreh Denaj.
E pyetur nga Eni Vasili se si janë zgjedhur këto biznese, Denaj u shpreh se: “Kjo është zgjidhur duke parë se cilët biznese janë mbyllur nga kjo pandemi. Biznesi që është mbyllur nga kjo situatë do të përfitojë.”
Ministrja tha se një punonjës që ka të paktën një pagë bazë 500 mijë lekë (të vjetra), do marrë pagën minimale, 260 mijë lekë (të vjetra).
“Po të gjithë punonjësit do të përfitojnë këtë vlerë. Duhet të kemi parasysh që në një situatë tjetër kjo nuk do të përfitohej”, përmbylli ministrja e e Financave dhe Ekonomisë Anila Denaj.
Mbrëmjen e sotme ka shkuar në 262 numri i të prekurve nga COVID-19 në Shqipëri, teksa deri tani janë regjistruar 15 viktima.
Më herët ditën e sotme ministrja e Shëndetësisë Ogerta Manastirliu dha një deklaratë për mediat, ku foli edhe rreth përfitimit të ndihmës ekonomike, duke theksuar se aplikimi do të realizohet online ose përmes shërbimit postar.
Ajo gjithashtu sqaroi qytetarët se do përfitojnë dyfishim të masës së ndihmës ekonomike rreth 64 mijë familje.
Ditën e sotme Shqipëria u fut në karantinë pa afat, pasi qeveria vendosi që të gjitha institucionet arsimore (përfshirë edhe çerdhet), do të qëndrojnë mbyllur deri në përfundimin e gjendjes së epidemisë të shkaktuar nga COVID-19.
Ndërkohë mësimi për të gjithë nxënësit vijon online, ndërsa ministrja Besa Shahini deklaroi dje se provimet e
Maturës Shtetërore nuk do të shtyhen por maturantëve do t’u bëhet favorizim, duke mos u pyetur në provim lidhur me leksionet që kanë marrë që nga koha kur janë izoluar në shtëpi.
Po ashtu edhe klinikat dentare do të jenë të mbyllura pas 3 prillit kurse spitalet publike dhe jopublike nuk do lejojnë të kryejnë operacione kirurgjikale.
Nuk do të lejohen grumbullimet masive në ambientet të hapura dhe të mbylluar kurse Komisionet e vlerësimit të KEMP-it nuk funksionojnë por qytetarët që nuk kanë mundësi të paraqiten do të vijojnë të marrin pagën e paaftësisë për punë.
