Me indentifikimin e rasteve të para me koronavirus në Shqipëri, qeveria vendosi mbylljen e shkollave për dy javë deri më 23 mars, e me shtimin e rasteve afati u shty deri më 3 prill.
Por duke marrë shkas nga zhvillimet në vend ministrja ka vendosur për mbylljen e të gjithë institucioneve publike dhe private deri në një kohë të pacaktuar.
Teksa ecuria e situatës nga COVID-19 duket e paparashikueshme, ministrja e Shëndetësisë Ogerta Manastirliu ka dhënë sot një urdhër lidhur me të gjitha institucionet arsimore (përfshirë edhe çerdhet), të cilat do të qëndrojnë mbyllur deri në përfundimin e gjendjes së epidemisë të shkaktuar nga COVID-19.
Ndërkohë mësimi për të gjithë nxënësit vijon online, ndërsa ministrja Besa Shahini deklaroi dje se provimet e Maturës Shtetërore nuk do të shtyhen por maturantëve do t’u bëhet favorizim, duke mos u pyetur në provim lidhur me leksionet që kanë marrë që nga koha kur janë izoluar në shtëpi.
Po ashtu edhe klinikat dentare do të jenë të mbyllura pas 3 prillit kurse spitalet publike dhe jopublike nuk do lejojnë të kryejnë operacione kirurgjikale.
Nuk do të lejohen grumbullimet masive në ambientet të hapura dhe të mbylluar kurse Komisionet e vlerësimit të KEMP-it nuk funksionojnë por qytetarët që nuk kanë mundësi të paraqiten do të vijojnë të marrin pagën e paaftësisë për punë.
Sakaq, ka shkuar në 259 numri i të prekurve nga COVID-19 në Shqipëri, pasi gjatë 24 orëve të fundit janë kryer 152 teste, në mesin e të cilëve 16 kanë rezultuar pozitiv.
Në spitalin Infektiv ndodhen 79 persona, 7 prej të cilëve janë terapi intensive, ku 4 janë intubuar, teksa pjesa tjetër e pacientëve janë të shtruar në pavion dhe paraqesin gjendje të stabilizuar shëndetësore.
Sipas specialists së ISHP, mosha mesatare e të prekurve është 50 vjeç dhe deri më tani numërohen 67 persona të shëruar dhe 15 viktima.
