Dy pacientë të infektuar nga COVID-19 kanë ndërruar jetë në Spitalin Infektiv sot njofton Ministria e Shëndetësisë.
Bëhet fjalë për një 77-vjeçar me iniciale I. B., nga Kavaja, i konfirmuar me COVID-19 që po trajtohej prej 2 javësh në Spitalin Infektiv, teksa ndërroi jetë në mënyrë të papritur nga një infarkt miokardik.
77-vjeçari vuante nga disa sëmundje, si diabet mellitus, insuficience renale kronike dhe insuficiencë kardiake.
Po ashtu, ka ndërruar jetë edhe pacienti me iniciale R. P. 69-vjeç nga Hasi, i cili është trajtuar prej 8 ditësh në Spitalin Infektiv ndërsa prej 3 ditësh gjendja e tij ishte rënduar dhe ishte në respiracion të drejtuar (i intubuar).
Pacienti R. P. ka qenë në gjendje të rëndë shëndetësore gjatë gjithë kohës dhe pavarësisht përpjekjeve të mjekëve, nuk arriti të mbijetojë.
Kështu, ka shkuar në 15 numri i personave që kanë humbur jetën me COVID-19 në Shqipëri.
Sakaq, ditën e sotme ka shkuar në 243 numri i të prekurve nga COVID-19, pasi gjatë 24 orëve të fundit janë shënuar 20 raste të reja nga 145 testime të kryera.
Sakaq, mëngjesin e sotëm ka ndërruar jetë edhe një 62-vjeçar nga Durrësi, duke e çuar në 13 totalin e viktimave, teksa në urgjencën e Infektivit janë të shtruar 77 persona, ku 8 prej tyre ndodhen në terapi intensive, 3 prej të cilëve janë intubuar.
Durrësi ka një shtim të ndjeshëm të numrit të të prekurve me 12 raste të reja, duke shkuar në 26, por nga ana tjetër gjatë 24 orëve të fundit janë shëruar edhe 8 pacientë duke e çuar numrin në 52 numrin e të shëruarve në total.
Shpërndarja gjeografike e rasteve pozitive, është si vijon:
– Tiranë 129 raste
– Durrës 26 raste
– Lushnje 4 raste
– Elbasan 5 raste
– Fier 23 raste
– Kavajë 4 raste
– Rrogozhinë 2 raste
– Korçë 15 raste
– Vlorë 5 raste
– Shkodër 8 raste
– Lezhë 5 raste
– Berat 1 rast
– Has 2 raste
– Krujë 5 raste
-Tropojë 4 raste
– Pukë 3 raste
– Mirditë 2 raste
