Prej mesditës në Kuvendin e Kosovës ka nisur seanca e jashtëzakonshme e cila vijon ende, ndërsa pas pak minutash pritet që deputetët të votojnë mocionin e mosbesimit ndaj qeverisë së Albin Kurtit.
Mirëpo, kryeparlamentarja e Kosovës Vjosa Osmani është shprehur sërish kundër mocionit të mosbesimit ndaj qeverisë së Albin Kurtit, e iniciuar prej partisë së saj, LDK-së.
“Nuk dua të merrem me njerëzit që në zgjedhjet e 6 tetorit morën zero besim nga populli. Unë do veproj ashtu sic tha Doris Pack para disa ditësh. Që në këtë rast i ndjeri presidenti Rugova do vepronte ndryshe. Si kryetare e Kuvendit kam bërë gjithçka që vendi të mos binte në këtë situatë që ndodhet sot, në një kohë pandemie. Duke votuar kundër mocionit votoj për të ardhmen e vendit tim. Vendit i duhet një qeveri që është e zonja të luftojë jo vetëm pandeminë por dhe krimin e korrupsionin. Na duhet solidaritet njerëzor e institucional me njëri-tjetrin. Unë do votoj kundër çdo mocioni që e lë qoftë dhe një qytetar pa disa ministra. Do votoj kundër çdo mocioni që e lë vendin pa Arben Vitinë”, u shpreh Vjosa Osmani.
Kujtojmë se disa ditë më parë Kurti është përfshirë në një përplasje me LDK, pas shkarkimit të ministrit të Brendshëm Agim Veliu, të cilin e akuzoi se ka përhapur panik për gjendjen e krijuar në Kosovë pas goditjes nga COVID-19.
Menjëherë, LDK i ka dërguar ultimatum Kurtit, duke thënë se do të bëjë një “mocion mosbesimi” kundër qeveris, çka do rrëzonte automatikisht Kurtin nga pushteti dhe në bazë të Kushtetutës kjo çon në zgjedhje të parakohshme.
