Ditë aspak të mira po kalon edhe Greqia, ku sipas të dhënave të fundit deri më tani janë 743 të prekur me Coronavirus, 20 viktima dhe 29 persona të shëruar.
Ditën e sotme tre persona kanë humbur jetën, si dhe janë konfirmuar 48 raste të reja me të prekur nga COVID-19 në vendin fqinj, teksa 45 nga pacientët e trajtuar janë në terapi intensive.
Gjatë një konference për shtyp, ministri grek i Shëndetësisë, Vassilis Kikilias, lajmëroi se Ministria po merr të gjitha masat e nevojshme për të mbrojtur qytetarët dhe madje shumë më herët se vendet e tjera.
Nga rastet e konfirmuara, 56% janë meshkuj, 75% janë 18 deri 64-vjeç dhe 21% janë më të vjetër se 65 vjeç, ndërkohë, mosha mesatare e të vdekurve është 78 vjeç.
Më herët pasditen e sotme, lajme të këqija erdhën edhe përtej Adriatikut, ku brenda 24 orësh janë regjistruar 743 viktima dhe 5, 249 të infektuar.
Deri tani në rang botëror janë shënuar 17,507 viktima dhe 402,159 të infektuar në 196 shtete, ndërsa në vendin tonë janë 123 të infektuar dhe 5 viktima.
