Mjekët kanë bërë me dije se 3 simptomat që shfaqen në rastet kur prekemi nga Coronavirusi janë: kolla e thatë, temperatura dhe vështrirësitë në frymëmarrje, teksa nga eksperiencat e ndara nga të infektuarit ka raste kur shfaq edhe simptoma të tjera, si: djersë, diarre, probleme me tretjen etj., duke e bërë të vështirë dallimin nga gripi.
Nga ana tjetër, mjekët kanë bërë me dije se pjesa më e madhe e njerëzve nuk do e kuptojnë se janë prekur pasi virusi nuk shfaq shenja.
Së fundmi, mjeku Pëllumb Pipero, i ftuar në ‘Open’, ka deklaruar se simptomat e Coronavirusit janë “si dy pika uji me ato të gripit” pra temperaturë, dhimbje koke, tharje fyti, marrje mendsh, kollë dhe diarre, por sipas tij, diferencën në këtë rast e bën vështirësia në frymëmarrje.
Pipero tha në emisionin “Open” se situata duhet marrë në konsideratë nëse pacienti ka temperaturë mbi 38 dhe frymëmarrje mbi 30 herë në minutë.
“Kjo është pyetja më e rëndësishme. Ky virus dhe kjo sëmundje e shkaktuar nga ky virus, ngjan si dy pika uji me gripin, kemi temperaturë, dhimbje koke, tharrje fyti, kollë, diarre, përzierje. Diferencën e bën frymëmarrja. Të mos ngatërrohet ankthi me vështirësinë në frymëmarrje, vështirësia në frymëmarrje është mbi 30 frymëmarrje në minutë sepse njeriu merr frymë por trupi nuk oksigjenohet sa duhet. Të shmanget frika, edhe unë kam frikë normalisht. Për temperaturën kemi patur të dhëna të ndryshme, kemi konsideruar mbi 38.5 që shoqërohet edhe me kollë dhe vështirësi në frymëmarrje, duhet të merret në konsideratë”, u shpreh mjeku Pipero.
Po ashtu, mjeku Pëllumb Pipero, me herët në emisionin ‘360 gradë’, ka deklaruar se në fakt janë mbi 1500 të infektuar, nisur nga ideja se pas një personi të prekur nga Coronavirusi fshihen 10 të tjerë.
Më herët ditën e sotme, si kryeministri Rama, ashtu edhe ministrja e Shëndetësisë, Ogerta Manastirliu, deklaruan se në ditët në vijim do të kemi një rritje të rasteve me të prekur nga Coronavirusi.
Po ashtu, Manastirliu bëri me dije se kontrata për blerjen e 54 respiratorëve është gati, teksa shtoi se po vijojnë procedurën për 100 respiratorë të tjerë, që do të mbërrijnë sipas një kalendari të mirëpërcaktuar.
Sipas saj, Ministria ka në gjendje 25 mijë maska dhe pritet furnizimi me 140 mijë maska, teksa deklaroi se po rritet me 10 mijë edhe stoku i veshjeve speciale dhe planifikojnë rritjen e tij me 50 mijë veshje.
COVID-19/ Manastirliu: “Kemi porositur 54 respiratorë të rinj, në gjendje 25 mijë maska”
Virusi i rrezikshëm që lindi në Kinë rreth 3 muaj më parë ka marrë deri tani 16, 350 jetë njerëzish dhe ka infektuar 374, 513 persona në 195 vende
