Ministria e Shëndetësisë mengjesin e sotëm njoftoi ndarjen nga jeta të një 61-vjeçari nga Tirana, duke e klasifikuar si viktimën e pestë nga koronavirusi në vendin tonë.
Vetëm pak minuta më vonë në një reagim, Ministria njoftoi se pacienti kishte kaluar vdekje klinike.
Mjeku Pëllumb Pipero, në një deklaratë për medat ka sqaruar situatën e 61-vjeçarit.
Pipero u shpreh se vdekja klinike e pacientit zgjati shumë, por mjekët reanimatorë e rikthyen në jetë.
Më pas ai shtoi se gjendja e 61-vjeçarit vijon të jetë e rëndë.
“Situata është dinamike, sa i përket rasteve të reja, ndjekjes së pacientëve të prekur, kemi më shumë se 40 të shtruar me problematika të ndryshme. Njëri nga rastet ka bërë vdekje klinike që zgjati gjatë, por mjekët reanimatorë e kthyen në jetë, vijon të jetë rëndë. Në këtë lloj situate të rasteve të shtuara këmbëngul t’ju them qytetarëve të jenë të duruar, të qendrojnë në shtëpi”, tha Pipero.
Bilanci i COVID-19 në vendin tonë është 89 të prekur, në mesin e të cilëve 4 viktima dhe një i shëruar.
Në spitalin Infektiv ndodhen 43 persona, 3 prej të cilëve në gjendje të rëndë.
