Ashtu sikundër kishte premtuar, ditën e sotme kryeministri Edi Rama do prezantojë planin ekonomik të qeverisë për përballimin e Coronavirusit.
Me anë të një reagimi në Facebook, kreu i qeverisë ka bërë me dije se plani do prezantohet në orën 19:00, teksa shprehet se sot ai nuk ka komunikuar shumë me qytetarët, pasi është marrë më detajet e planit ekonmik me ekspertët vendas e të huaj që po e përpilojnë atë.
Edhe një herë kryeministri thekson se me durim e besim do dalim më të fortë nga kjo luftë, referuar COVID-19, teksa në fund e mbyll me “Ju dua”.
“PAS PAK, NË 19.00 SHPALLJA E PLANIT FINANCIAR PËR PËRBALLIMIN E PASOJAVE TË LUFTËS, NË KËTË FAQE DHE NË ÇDO EKRAN QË DO TË DËSHIROJË TA TRANSMETOJË .NDJESË QË SOT KEMI KOMUNIKUAR MË PAK, POR MË ËSHTË DASHUR KOHA PËR TË KONFIRMUAR PLANIN NË ÇDO DETAJ, ME GRUPIN E PUNËS DHE ME EKSPERTË NDËRKOMBËTARË.
KAM SHUMË BESIM QË ME DURIM TË MADH DHE KONTRIBUTIN E SECILIT NE DO DALIM TË GJITHË MË TË MIRË E MË TË FORTË NGA KJO LUFTË. I LOVE YOU“, shkruan Rama.
Kujtojmë se deri tani qeveri të ndryshme kanë marrë masa të rëndësishme për të mënjanuar krizën ekonomike që ka shkaktuar virusi.
Qeveria gjermane ka miratuar paketën më të madhe të ndihmës ekonomike të Gjermanisë, me vlerë 550 miliardë euro për kompanitë e ndryshme, duke iu ofruar atyre kredi për të mbajtur bizneset e tyre hapur.
Kryeministri italian Giuseppe Conte, ka miratuar dekretin ‘Cura Italia’ për emergjencën e Coronavirusit, duke ofruar 25 miliardë euro për familjet dhe bizneset.
Britania e Madhe hartoi planin e saj, që parashikon: 1 miliardë paundë ndihmë direkte për familjet në nevojë që shpërndahet menjëherë nga Këshillat Vendore; 3 muaj shtyje të pagesës së kredisë; 330 miliardë paundë para në treg për të ndihmuar biznesin; 25 mijë paundë ‘cash’ për çdo biznes të vogël (pub, bar, dyqan i vogël) së bashku me përjashtim 1 vit nga taksat; një paketë mbështetëse e mundshme posaçërisht për linjat ajrore dhe aeroportet; ndihmë direkt në para për këdo që humb punën në rreth 90 paund në javë.
Edhe qeveria greke shtoi masat ekonomike këtë të mërkurë duke caktuar një shumë prej 3.8 miliardë eurosh, për efektet e pandemisë në ekonominë greke.
