Tashmë epiqendra e COVID-19 është zhvendosur më Europë, ku virusi po përparon ndjeshëm.
Itali është vendi me situatën më problematike, por ditët e fundit bilanci nga Coronavirusi është thelluar edhe në Spanjë, teksa deri tani janë shënuar 767 viktima dhe janë infektuar 17,147 persona.
Në spitale janë shtruar më shumë se 3 mijë veta, ndërsa të vdekurit po shtohen me ritme të larta dhe sipas mediave vendase çdo 16 minuta një person humb jetën në spitalet e Madridit.
Të dhënat janë publikuar në faqen online të El Pais, që shpjegon se bilanci nuk përfshin personat që kanë ndërruar jetë në struktura të tjera sociale-shëndetsore.
Sipas ekspertëve është e pamundur të zbulohet numri real i të prekurve dhe aludohet se në kryeqytet mund të ketë me dhjetëra mijëra të infektuar.
Numri total i viktimave në rang botëror deri tani është 9, 377 persona dhe janë 228,687 të infektuar në 177 vende, teksa në Kinë në 24 orët e fundit për herë të parë që nga shpërthimi i virusit nuk është shënuar asnjë i infektuar.
Deri tani në vendin tonë kanë humbur jetën 2 persona dhe janë infektuar 64 të tjerë, teksa në Kosovë janë 20 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
