Ndonëse në vendin tonë është shënuar viktima e parë nga COVID-19 dhe janë 11 persona të infektuar, qytetarët nuk po ndërgjegjësohen dhe vijojnë të frekuentojnë masivisht restorantet, lokalet dhe vende të tjera publike.
Në këto kushte, kreu i qeverisë lajmëroi ditën e sotme mbylljen e çdo restoranti e lokali në Tiranë e Durrës, teksa është shprehur se personat që vijnë nga Italia dhe Greqi dhe nuk respektojnë rregullat e vetëkarantinimit, do të gjobiten me 5 mijë euro dhe paralajmëroi edhe ngritjen e postblloqeve nga policia dhe ushtria.
Deklarata e Ramës u pasua nga një konferencë për shtp e ministers së Shëndetësisë, Ogerta Manastirliu, e cila ka bërë me dije masat e reja për përballimin e situatës.
Manastirliu tha se situata po përshkallëzohet, mirëpo theksoi se autoritetet nuk e kanë ndihmën e qytetarëve.
Në këto kushte, Manastirliu u shpreh se kanë vendosur që të marrin disa masa duke filluar nga mbyllja e lokaleve, bare, restoranteve dhe gjobitja me 20 milionë lekë të vjetra për ata që shkelin urdhrin.
Po ashtu, ministrja tha se do i propozojë qeverisë dhe gjobitjen e personave që nuk zbatojnë karantinimin e detyrueshëm, si edhe masat e mëposhtme:
1. Mbylljen deri në një njoftim të dytë, të të gjitha bareve, lokaleve restoranteve dhe klubeve, në Tiranë dhe Durrës fillimisht.
2. Caktimin e një gjobe në masën 5 mijë euro, për të gjithë ata qytetarë që vijnë nga zonat e prekura dhe nuk zbatojnë Urdhërin e vetëkarantinimit të detyrueshëm apo ata qytetare qe nuk zbatojne vetkarantinimin pas konfirmimit të diagnozës.
3. Caktimin e një gjobe në masën 20 milionë lekë të vjetra për të gjithë baret, restorantet, lokalet apo klubet që nuk e zbatojnë këtë Vendim dhe rihapen në shkelje të tij.
4. Vendosjen e distancës së sigurisë mes punonjësve, prej 1.5 metra, në të gjitha bizneset që nuk mund të mbyllen për arsye të zinxhirit ekonomik.
5. Reduktimin në maksimum të personelit të call center-ave dhe garantimin e distancave dhe të kushteve mbrojtëse për çdo punonjës! Sa më sipër, kërkojmë mirëkuptimin tuaj për veten tuaj, për familjet tuaja dhe për familjet e punonjësve tuaj.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
Deri tani në rang global janë shënuar 4,382 viktima dhe janë infektuar 121,739 persona.
