Në një kohë kur bota është ‘paralizuar’ nga Coronavirusi dhe ndodhemi në prag të shpërthimit të pandemisë, duket se ka njerëz të cilët jo vetëm që nuk frikësohen nga kjo gjë, por përdorin situatën për të përfituar.
Ditët e fundit ka nisur të qarkullojë një e-mail me logon e Organizatës Botërore të Shëndetësisë, ku jepen disa këshilla për tu mbrojtur nga virusi kinez.
Në mënyrë që të shkarkohet dokumenti me këshillat e pretenduara, kërkohen të dhënat personale të përdoruesve.
Në fakt, e gjithë kjo është një vjedhje që u bëhet të dhënave personale dhe sipas kompanive të sigurisë në Internet, nuk duhet të jepni të dhënat tuaja në këto faqe.
Përveç të tjerash, e-maili është edhe me gabime drejtshkrimore, duke konfirmuar faktin që kemi të bëjmë me të ashtuquajturën “Phishing”, teknikë që përdoret për vjedhjen e të dhënave në Internet.
Shumë kompani kanë dërguar email-e te stafet e tyre me qëllim që ti vënë në dijeni të kësaj situate dhe kanë kërkuar që të lexojnë çdo informacion të nevojshëm në faqen zyrtare të Organizatës Botërore të Shëndetësisë.
Thirrje për kujdes kanë bërë edhe kompanitë që merren me të dhënat e privatësisë në Internet, teksa kanë kërkuar nga njerëzit që të mos bien pre e emrit të dërguesit të email-it, të shohin me kujdes linkun se ku të dërgon ky e-mail e po ashtu të lexojnë me vëmendje, pasi nëse ka gabime gramatikore, me siguri janë përballë një grupi kriminal, i cili kërkon të vjedh të dhënat private.
Deri më tani Coronavirusi ka vrarë të paktën 2700 persona, teksa janë prekur më shumë se 80 mijë të tjerë në rang botëror.
Situata më e rënduar paraqitet në Kinë, vendi ku lindi virusi, ndërsa gjendja është serioze edhe në Korenë e Jugut dhe Itali.
Në Itali kanë vdekur 7 persona dhe janë prekur të paktën 230 të tjerë, ndërsa në Korenë e Jugut janë 830 të prekur.
