Policia e Shtetit prej dy javësh ka nisur publikimin e emrave dhe fotografive të 50 personave më të kërkuar nga autoritetet shqiptare, të akuzuar për një sërë veprash penale, si: vrasje, rrëmbim, rrahje, grabitje me dhunë, e armëmbajtje pa leje.
Ditën e sotme janë publikuar emrat e 3 personave të radhës, të shpallur në kërkim për veprën e rëndë “Vrasje me paramendim”.
Gentian (Eugen) Sula
Ka vrarë në bashkëpunim me disa persona të tjerë shtetasin B.F. më datë 19 mars 1997, në lagjen nr. 5, Korçë, ndërsa si pasojë e shkëmbimit të zjarrit ka gjetur vdekjen po ashtu edhe bashkëpunëtori i Gentianit, shtetasi D. B.
Sula është dënuar nga Gjykata e Apelit Korçë, me 25 vjet burg, për veprat penale “Vrasja me paramendim, kryer në bashkëpunim” dhe “Armëmbajtja pa leje”.
Besnik Lamçja
Ka vrarë me armë zjarri shtetasin me iniciale E.Ç. më datë 27 qershor 2000, në rrugën “Siri Kodra”, Besnik Lamçja, në bashkëpunim me shtetasin E. Ç.
Lamçja është dënuar me 25 vjet burgim, nga Gjykata e Rrethit Gjyqësor Tiranë, për veprat penale “Vrasja me paramendim, kryer në bashkëpunim” dhe “Vjedhja me armë”.
Kujtim Qordja
Ka vrarë me armë zjarri shtetasin P.U. në vendin “Urën e Babrroit”, në Tiranë.
Ai është dënuar me 25 vjet burgim, nga Gjykata e Rrethit Gjyqësor Tiranë, për veprën penale “Vrasja me paramendim, kryer në bashkëpunim”.
