Muaji i parë i 2020 u mbyll me një bilanc tragjik sa i përket aksidenteve automobilistike, ku u shënuan të paktën 506 aksidente dhe 16 viktima.
I njëjti raport negativ vijon të ndjehet edhe në muajin shkurt, pasi aksidente të ndryshme janë regjistruar përgjatë 2 javëve të para.
Mbrëmjen e sotme, në rreth dy orë, janë raportuar 3 aksidente në 3 qytete të ndryshme të vendit.
Kështu, në aksin rrugor Fushë Krujë-Milot, në afërsi të fshatit Gramëz, si pasojë e një aksidenti të trefishtë ka mbetur i plagosur një person.
Nga raportimet e para thuhet se në aksident janë përfshirë dy makina dhe një motoçikletë, ndërsa i plagosuri ka marrë plagë të rënda dhe është dërguar me urgjencë në Spitalin Ushtarak.
Po ashtu, një 24-vjeçar ka mbetur i plagosur në qytetin e Korçës, pasi u përfshi në një aksident në aksin rrugor Korçë-Voskopojë.
I riu Martin M., rreth 24 vjeç, i cili ishte duke drejtuar mjetin tip “Lancia”, kur ka humbur kontrollin dhe për pasojë ka dalë nga rruga, duke përfunduar në derën e një gomisterie.
Drejtuesi i mjetit, u transportua në Spitalin e Korçës ku ndodhet nën kujdesin e mjekëve.
Së fundmi, raportohet për një aksident në qytetin e Lezhës, ku dy makina janë përplasur me njëra-tjetrën, teksa nuk dihet ende sa të plagosur janë regjistruar.
Kujtojmë se aksidentet e shumta rrugore kanë bërë që masat ndaj shoferëve të shtohen dhe muajin që lamë pas policia paralajmëroi se shumë shpejt, përveç dregerit të alkoolit, do përdorë edhe dragerin për të parë nëse drejtuesit kanë konsumuar lëndë narkotike.
Po ashtu, ministri i Brendshëm, Sandër Lleshaj deklaroi se për herë të parë në Shqipëri shoferët do t’i nënshtrohen të ashtuquajturit ‘testi i idiotit’, për të parë gjendjen e tyre psikologjike kur efektivët shohin sjellje të dyshimta.
