Punonjësit e nënstacionit të pompimit të Poçemit janë futur në ditën e 7-të të grevës së urisë.
Edhe pse gjendja e tyre është rënduar nga mungesa e të ushqyerit, ata shprehen se do të shkojën deri në vdekje, nëse nuk marin rrogat.
“Do të qëndrojmë këtu deri në vdekje nëse nuk marrim lekët”, shprehet një punonjës.
Gjendja e rënduar e tyre konfirmohet edhe nga mjekja.
Edhe naftëtarët e Ballshit ndërkohë nuk kanë ndërmend të tërhiqen nga kauza e tyre.
Sot ata kanë hyrë në ditën e tretë të urisë, ndërsa deklarojnë se përveç një përfaqësuesi të Avokatit të Popullit, askush nuk i ka kontaktuar.
Ata refuzojnë ushqimin, ujin dhe ndihmën shëndetësore, duke thënë se do të ketë edhe viktima, nëse nuk u japin 5 rrogat e prapambetura.
Kujtojmë këtu se rafineria e Ballshit, e administruar nga “Tosk Energji”, është mbyllur në muajin shtator, duke nxjerrë në rrugë të madhe 800 punëtorë.
Pas mbylljes së rafinerisë, “Bankers” ka akuzuar “Tosk Energji”, për shkelje të kontratave, çka e ka detyruar që naftën në gjendje, ta kalojë për eksport.
