Komisioneri Publik ka kërkuar shkarkimin e prokurorit Besnik Cani, njëkohësisht anëtar i Këshillit të Lartë të Prokurorisë.
Sipas Komisionerit Publik, Cani ka deklarim të pasaktë të pasurisë dhe mungesë të burimeve të ligjshme.
Seanca ndaj Canit u zhvillua ditën e sotme në Komisionin e Posaçëm të Apelimit.
Disa nga gjetjet e Komisionerit Publik lidhen me dy shuma për blerjen e banesës, një truall 600m2 në Paskuqan, një autoveturë dhe një garazh.
Për vitet në të cilat ka deklaruar pasurinë, prokurori ka një bilanc negativ prej 500 mijë lekësh.
Ndërsa për periudhën 2010-2015, subjekti ka bilanc negativ prej 2 milion lekësh, ndërmjet të ardhurave dhe shpenzimeve.
“Për KP nga shqyrtimi i dosjes u provua se subjekti gjendet në kushte të pamjaftueshme për dy shuma të blerjes se banesës. – subjekti ka deklarim të pasaktë, mungesë të burimeve të ligjshme. Në lidhje me pasurinë, truall 600 m2 në Paskuqan, nuk provohet burimi i ligjshëm i saj. Lidhur me pasuritë autoveturë dhe garazh, subjekti ka deklarim të pasaktë ndër vite dhe mungesë të burimeve të ligjshme për blerjen e këtyre pasurive. Në ato vite ka një bilanc negativ prej gai 500 mijë lekë. Nër periudhën 2010-15 subjekti ka një bilanc negativ 2 milion lekë mes të ardhurave të ligjshme dhe shpenzimeve. Për aftësitë profesionale, konfirmimi në detyrë është vendosur në vlerësim të gabuar të provave. Subjekti ndodhet në kushtet ku me veprimet dhe mosveprimet e tij, marrëdhënies së tij me një kompani tregtare, si dhe përfiimi i statusit të të pastrehut kur kryente detyrën e titullarit të Prokurorisë Fier, Komisioneri Publik rithekson se këto kushte bien ndesh me detyrën e magjistratit. Për kriterin e pasurisë, subjekti rezulton me mungesë të burimeve financiare. Pëfundimisht kërkojmë: Shkarkimin nga detyra të Besnik Canit,” thuhet në deklaratën zyrtare të KP-së.
Vetë prokurori u justifikua, duke thënë se tokën po e paguan me kredi, ndërsa banesa është ndërtuar me kontriburtfamiljar.
“Nuk mund të mohohet lufta që kam bërë kundër gjakmarrjes gjatë kohës që drejtova Prokurorinë e Shkodrës. Reforma u pa si në dritë të tynelit nga populli shqiptar dhe unë. Kjo reformë u prit me entuziazëm, megjithatë sot përballem me ju për debatet mbi dokumentacionin. Shpresa ime në këtë proces është një analizë profesionale. Në 26 vite punë të miat dhe bashkëshortes, kemi si pasuri një apartament në Laprakë, një autoveturë dhe një vendparkimi, një sipërfaqe toke në Paskuqan, qe po e paguaj me kredi. Ish-banesa aty është ndërtuar me kontribut familjar. Pasuria dhe niveli i jetesës është krejtësisht normal për një familje me dy të punësuar,” mësohet të ketë thënë Cani.
Në rekomandimin e ONM ndër të tjera thuhet se Cani ka tentuar të përfitojë një kredi të butë në Bashkinë e Fierit, ndërsa nuk ka hetuar ish-kryebashkiakun Baftjar Zeqo.
Besnik Cani u konfirmua në detyrë nga Komisioni i Pavarur i Kualifikimit në nëntor të 2018-ës.
Pas ankesave të Komisionerit Publik, dosja e tij shkoi në Komisionin e Posaçëm të Apelimit.
Ky organ hodhi poshtë kërkesën e prokurorit për pezullimin e gjykimit ndaj tij më 11 shkurt.
Cani gjithashtu ka kallëzuar në SPAK dy anëtarët e KPA, Artan Hajdarin dhe Luan Dacin, duke kërkuar shkarkimin e tyre.
