Teksa coronavirusi ka shkaktuar mbi 1660 humbje jete dhe mbi 60 mijë të prekur, fatmirësisht, vendi ynë po vazhdon t’i rezistojë virusit vdekjeprurës.
Megjithatë, autoritetet shëndetësore shqiptare prej javësh kanë bërë me dije se janë marrë masat e nevojshme parandaluese dhe se janë duke diskutuar për vendet e mundshme ku mund të ngrihet karantinë, në rast se coronavirusi godet vendin tonë.
Disa ditë më parë Ministria e Shëndetësisë tha se nuk mund të deklarojë ku do të jetë karantina për arsye sigurie, ndonëse shumë vende i kanë treguar ato.
Sipas Top Channel janë dy vende të mundshme ku do të ngrihen karantinat: një mundësi është boshatisja e godinës së shërbimit infektiv në QSUT dhe trasferimi i pacientëve drejt spitaleve të tjera, ndërsa mundësia tjetër është ngritja e një zonë karantinore në pjesën jugore të Tiranës, larg zonës së banuar.
Karantina ngrihet për ato raste që do të dyshohen se janë prekur nga coronavirusi për t’i mbajtur ata të veçuar nga njerëzit e tjerë, duke i ofruar të gjitha shërbimet deri në përfundim të periudhës se inkubacionit e cila është përcaktuar 14 ditë.
Kujtojmë se ende nuk është gjetur një vaksinë parandaluese për virusin kinez, ndonëse shkencëtarë nga e gjithë bota po punojnë prej muajsh.
