Të paktën 900 persona kanë humbur jetën si pasojë e coronavirusit dhe janë infektuar 40, 000 të tjerë në Kinë dhe 350 jashtë saj.
Në Europë janë regjistruar 30 raste , por OBSH ka paralajmëruar se numri do të rritet shumë shpejt.
Në këto kushte Bashkimi Evropian do të zhvillojë të enjten një takim të jashtëzakonshëm të ministrave të Shëndetësisë, së bashku me një të dërguar të Organizatës Botërore të Shëndetësisë (OBSH), për të diskutuar rreth shpërthimit të koronavirusit të ri në Kinë.
Ministrat e BE do të diskutojnë mbi masat që duhen marrë për parandalimin e virsuit vdekjeprurës.
“Tani është koha për të bashkuar forcat për ta ndaluar këtë epidemi”, tha komisionari evropian për Menaxhimin e Krizave, Janez Lenarçiç.
Ndërsa ministri gjerman i Shëndetësisë, Jens Spahn, javën që lamë pas ka sugjeruar se Evropa duhet t’iu vendosë kufizime udhëtarëve nga Kina, por për këtë masë të tillë duhet të pajtohen të 27 vendet anëtare të BE-së.
Koronavirusi shkakton infeksion të rëndë akut të frymëmarrjes dhe simptomat zakonisht fillojnë me ethe dhe kollë të thatë. Aktualisht nuk ka vaksinë për të.
Dy ditë më parë, Komisioni Kombëtar i Shëndetit në Kinë i ka ndryshuar emrin Koronavirusit, i cili përkohësisht do të quhet Pneumonia Novel Coronavirus, ose NCP.
Ky hap u ndërmor pasi banorët e Whanit e kanë parë diçka te tillë si jo të drejtë për ta dhe stigmatizuese.
