La Repubblica i ka dedikuar një artikull fierakut Gazmend Hysnaj i cili është kthyer në hero të ditës për mediat italiane pasi ka vrapuar për të shpëtuar jetë njerëzish pas rënies së tërmetit në Siçili.
Kujtojmë që një ditë më parë një tërmet me magnitude 4.8, goditi Siҫilinë në orën 03:18 në pjesën e vullkanit Etna, që cilësohet si më aktivi në Europë.
“Qyteza Zafferana Etnea me fraksionin e saj Fleri, është një nga më të dëmtuara. Ndër rreth 9 mijë banorë që jetojnë në këtë komunë, 186 janë emigrantë shqiptarë. E mes tyre është dhe shqiptari nga Fieri Gazmend Hysenaj, me profesionin murator. Janë heronjtë e rastësishëm të Flerit, qytezës më të goditur nga tërmeti. Në zemër të natës, të mbijetuar nga lëkundja e fortë sizmike, vrapuan të shpëtojnë fqinj, miq e familjarë.
Një prej tyre është shqiptari nga Fieri, Gazmend Hysenaj, i cili ka mbërritur në Itali vetëm një vit më parë, në kërkim të një të ardhme më të mirë për fëmijët e familjen e tij. Gazmendi rrëfen se është zgjuar në mes të natës nga të qarat e fëmijëve të tij e ulërimat e komshiut.”- shkruan e përditshme La Repubblica.
“Janë momente që s’mbarojnë kurrë. Mora gruan e tre fëmijët në krah e i nxorra në rrugë me shpejtësi. Por fqinji vazhdonte të thërriste, ‘më shpëtoni, ndihmë, kam mbetur i bllokuar në gërmadha’.
Porta e banesës së tij ishte e bllokuar. U mundova ta hap duke e shtyrë me trup por ishte e pamundur. Në atë moment një tjetër lëkundje tërmeti n’a trembi. Mora tulla e gurë të rrëzuar që gjeta përreth e fillova ta shkatërroj portën, munda të shpërthej e të ndihmoj fqinjin tim të dalë i gjallë nga gërmadhat e banesës”,- rrëfen Gazmendi, sipas artikullit që shkruhet nga La Repubblica.
Si pasojë e tërmetit të fuqishëm natën e kaluar, 600 banorë kanë mbetur pa shtëpi dhe ndërkohë janë rregjistruar edhe 10 lëkundje të tjera nga mbrëmë sot.