Ditën e djeshme u gjend i vdekur në burgun e Peqinit, Andon Mëhillaj, ish-anëtar i bandës së Julian Sinanaj, i cili kryente vrasje me pagesë.
Familja e tij ngriti dyshime të forta për shkaqet e vdekjes, madje hodhi akuza ndaj autoriteteve të burgut për helmim.
Ndërkohë në rezultatet paraprake të ekspertizës mjeko-ligjore thuhet se vdekja ka qenë e menjëhershme, për shkaqe ende të pa sqaruara.
“Vdekje e menjëhershme për shkaqe ende të pasqaruara! Do pritet rezultati përfundimtar i autopsisë pas 29 ditësh”, thuhet në raportin paraprak.
Andon Mëhillaj njihet ndryshe si kapoja i “Bandës së Tritolit” në Vlorë.
Ai ishte dënuar me burgim të përjetshëm, si anëtar i bandës së vrasësit me pagesë, Julian Sinanaj.
Mëhillaj u vetëdorëzua në policinë e Vlorës në vitin 2014, pasi ishte shpallur në kërkim.
Mbi të rëndonte akuza e sekserit, që ndërmjetësonte pazaret ndërmjet biznesmenëve dhe Julian Sinanajt.
Viktima nuk ka pranuar asnjëherë akuzat, madje avokati i tij, Edmond Dema, tha ditën e djeshme se Mëhillaj ishte një njeri normal, që nuk ka prekur kurrë armë me dorë dhe çedoi për shkak të një problemi me pronat.
Mësohet se Mëhillaj kishte tentuar dy herë në burg vetëvrasjen, duke shtuar dozat e ilaçeve që merrte për depresion.
Pjesë e bandës ishte edhe kushëriri i tij, Genis Mëhillaj, i cili figuron si person në kërkim nga Interpol për “Akte terroriste” dhe “Financim të terrorizmit”
