Organizata e Kombeve të Bashkuara ka deklaruar se bota duhet të përgatitet për një rritje të mprehtë të numrit të refugjatëve pasi miliona njerëz mund të detyrohen të ikin për shkak të ndryshimit të klimës.
Në një intervistë për Reuters Filippo Grandi, Komisioneri i Lartë i Kombeve të Bashkuara për Refugjatët, tha se një vendim i Kombeve të Bashkuara këtë javë përcakton që personat të cilët ikin nga ndryshimet klimatike duhet të trajtohen si refugjatë klimatikë nga vendet e tyre pritëse dhe kjo do të sjellë pasoja të mëdha për qeveritë.
Ky vendim është marrë të hënën.
Shkaqet e mundshme të këtyre lëvizjeve mund të jenë zjarret siç janë ato në Australi, ngritja e niveleve të detit që prekin ishujt me lartësi të ulët, dëmtimi i kulturave bujqësore dhe bagëtive në Afrikën nën-Sahariane dhe përmbytjet në të gjithë botën, përfshirë pjesë të botës së zhvilluar.
“Migrimi i popullatës është një sfidë globale që nuk mund të kufizohet në disa vende,” -tha Grandi.
Aktualisht po ndihmohen më shumë se 70 milion njerëz të zhvendosur në të gjithë botën.
Turqia është pritësi më i madh me më shumë se katër milion refugjatë dhe azilkërkues, shumica e tyre nga Siria.
Grandi tha që qeveritë evropiane duhet të mendojnë për zgjidhje shumë serioze për krizën e migrantëve që ka prekur vendet e tyre që nga viti 2015, si dhe të vlerësojnë situatën në të cilën ndodhet Turqia.
