Vitet e fundit vendi ynë po përballet me emigrim në shkallë të gjerë të popullsisë.
Ndër kategoritë që largohen më së shumti janë bluzat e bardha.
Më së shumti ata janë të prirur të shkojnë drejt vendeve perëndimore, kryesisht në Gjermani, e cila po ofron gjithnjë e më shumë lehtësi ndaj emigrantëve.
Së fundmi, duket se qeveria është “sensibilizuar” nga këto largime.
Ajo ka akorduar një bonus për mjekët që do japin shërbimet e tyre në spitalet rajonale.
Shkak për këtë vendim është bërë edhe mungesa e mjekëve specialistë në spitalet rajonale e bashkiake.
Përveç rrogës mjekët do marrin edhe 250 mijë lekë në muaj.
Më parë ky bonus ka qenë 100 mijë lekë në muaj.
Njoftimi i plotë
“Për raste të veçanta të mungesës së mjekut specialist në shërbime të ndryshme të spitaleve rajonale e bashkiake, ministri i Shëndetësisë dhe Mbrojtjes Sociale, brenda numrit të përgjithshëm të personelit spitalor, urdhëron kontraktimin, për një periudhë të caktuar, të mjekëve specialistë, sipas nevojave. Këta mjekë të specialiteteve të ndryshme, përveç pagës, trajtohen financiarisht me një bonus deri në 250 000 (dyqind e pesëdhjetë mijë) lekë në muaj. Vlera e bonusit përcaktohet, rast pas rasti, nga ministri i Shëndetësisë dhe Mbrojtjes Sociale. Ky bonus, për efekt të llogaritjes së kontributeve të sigurimeve shoqërore dhe shëndetësore, trajtohet sipas shkronjës “e”, të pikës 2, të kreut II, të vendimit nr.77, datë 28.1.2015, të Këshillit të Ministrave, “Për kontributet e detyrueshme dhe përfitimet nga sistemi i sigurimeve shoqërore dhe sigurimi i kujdesit shëndetësor”, të ndryshuar.
Stimul ky për bluzat e bardha që profesionalizmi dhe thirrja drejt misionit të jetë sa më e fortë.”
