Lideri i Aleancës për Shqiptarët në Maqedoninë e Veriut, Zijadin Sela, ka folur rreth ‘Mini-Shengenit’.
Sela tha në një intervistë për KosovaPress, se nisma e Mini-Shengenit është një skandal për faktorin politik shqiptar kudo që ndodhet.
Sela u bëri thirrje politikanëve të Kosovës që të formojnë sa më shpejt qeverinë, që t’i përgjigjen institucionalisht kësaj nisme.
Më tej, Sela tha se deklaratat e kryeministrit Edi Rama i kanë irrituar shqiptarët.
“Ndjehem i zhgënjyer si çdo shqiptar që jeton në këtë botë. Deklaratat e kryeministrit të Shqipërisë i kanë bërë shqiptarët që të flasin me vete dhe të ndjehen të irrituar, me të drejtë. Çdo nismë duhet të kalojë përmes Prishtinës, as nëpërmjet Tiranës dhe as Shkupit dhe asnjë kryeqyteti tjetër në rajon”.
Sipas Selës, politikanët shqiptarët kanë luftuar vazhdimisht që të largojnë influencën ruse nga rajoni.
“Tani nëpërmjet kësaj nisme, po shoh që jo vetëm nuk po largohet Rusia, por përmes Serbisë, po vjen e po ulet këmbëkryq në mes të Tiranës” .
Ashtu si Kosova, edhe Sela mendon se Shqipëria nuk duhet të ulej në tavolinë me Serbinë për sa kohë ajo nuk ka pranuar gjenocidin ndaj shqiptarëve të Kosovës.
