Kryeministri Edi Rama ka folur sërish për mediat pas mbylljes së Samitit të Minishengenit Ballkanik.
Rama iu është përgjigjur zërave që thonë, se nga marrëveshja përfiton vetëm Serbia, duke i quajtur broçkulla.
Shefi i qeverisë vuri theksin tek rëndësia e pranisë së Kosovës në tryezën e bisedimeve.
Ai theksoi se qendrimi i tij, por edhe i SHBA-ve dhe BE-së për pavarësinë e Kosovës, nuk ka ndryshuar.
“Mos vallë BE dhe SHBA kanë mbyllur sytë ndaj të shkuarës, mos e kanë lënë gjithmonë pas, mua nuk më rezulton kështu, mua më rezulton që të gjithë janë në një opozicion, Serbia duhet të njohë Kosovën por jemi në përditshmërinë që vazhdon, duhet më shumë largpamësi, dhe unë jam më larg se ju , dje isha hero kur isha në Beograd dhe kërkova njohjen e Kosovës nga Serbia, unë bëj detyrën time dhe ca do thoni nesër kur dhe Kosova të ulet në tryezë? Që i fali krimet? Kjo zhurmë e madhe është rezultat i atyre që janë futur në një rreth vicioz nga i cili uroj të dalin sa më pare”, u shpreh Rama.
Kryeministri ka shtuar më tej, se Serbia ishte kundërshtarja e parë e kësaj ideje, por sot e pranon.
Duke i quajtur vëllezër kosovarët, Rama shtoi se Kosova është gabim dhe duhet të qëndrojnë pranë Shqipërisë dhe miqve të SHBA-ve dhe BE-së.
“Serbia ka qenë kundërshtarja e parë, sot Serbia e pranon. Unë s’kam autoritet t’i urdhëroj por tu them jeni gabim vëllezër, Kosova nuk ka nevojë për një garë të brendshme, për teori konspiracioni, Kosova duhet të qendrojë fort, afër ,në krah me Shqipërinë dhe miqtë e ditës së parë SHBA dhe BE e mos kthejë strategjinë e së ardhmes në një luftë politike të ditës.Kosova duhet të jetë në tryezë. Është një cmenduri ky debat që zhvillohet sot sepse duhet t’i referoheni procesit të Berlinit, referojuni marrëveshjeve, takimeve që janë bërë atje. Politika nuk është boks, është shah në pjesën më të madhe të kohës, ka një kohë për luftë, ka një kohë për paqe, për t’u tërhequr. Është absurd kur ti ke përfitimet e tua për këto bisedime. Unë takohem e flas me Thaçin, unë thjesht mbaj qendrimin tim dhe jap sugjerimin tim. Jam 100% me të drejtën se po mos isha, një nga vendet mike do më thonin kjo s’është e drejtë ndërkohë që kam mbështetjen e SHBA-së mike, të të gjithëve. Këtu s’jemi përballë asnjë detyrimi por para faktit për të bërë histori së bashku.Për të cuar përpara lëvizjen e lirë të njerëzve të mallrave, është shumë e thjeshtë”, vijoi Rama.
Ndër të tjera, Rama shtoi se Kosova ka 5 vite që është ulur në tryezë me Serbinë dhe me refuzimin ndaj minishengenit po futet në një rrugë qorre.
