Aktorja e njohur shqiptare Olta Gixhari prej disa muajsh ka zbuluar se i është futur rrugës së biznesit privat, duke lënë më në hije karrierën si aktore.
“Është e pamundur që të jetosh me profesionin që kam unë. Unë po realizoj ëndrrën time për ta kthyer aktrimin në një hobi. Unë ja kam dalë shumë më mirë se shumë kolegë të mi nga ana monetare sepse kam bërë televizion. Leku të jep guxim është e vështirë të luhet me kafshatën e gojës. Gjithmonë më kanë pëlqyer punët e meshkujve” – ka treguar Olta e ftuar sot në “Thumb”.
Por tashmë që Olta drejton një kompani të sajën, ka treguar se puna si shefe nuk qenka kaq e lehtë për të.
Pavarësisht se ndihet mirë me atë që bën, aktorja e njohur ka zbuluar se ka dalë edhe duke qarë nga zyra për shkak se punonjësit e keqkuptojnë autoritetin e saj si shefe.
“Si shefe unë? Tmerr. Unë kam gjithë kohës dy ekstreme, ose me marrin me shaka ose më marrin shumë seriozisht dhe më kanë frikë. Unë i kam të dyja palët në zyrë dhe e ndjej shumë. Ata influencojnë njëri-tjetrin kur ikën shefja. Ka patur raste kur kam dalë duke qarë nga zyra ose kam marr dy ditë pushim. Qenka shumë e vështirë që të drejtosh një gjë tënden, djersën tënde”- është shprehur Olta në “Thumb”. /iconstyle.al/
