Ashtu siç kishte paralajmëruar edhe ditën e djeshme, presidenti Ilir Meta, priti ditën e sotme në një takim 90 minutësh, krerët e partive opozitare jashtë parlamentit.
Takimi nisi në orën 09:00, ashtu siç ishte parashikuar.
Në takim morën pjesë, kreu i PD, Lulzim Basha, zv.kryetari i LSI, Petrit Vasili, kreu i LZHK, Dashamir Shehi, Vangjel Dule i PBDNJ, Agron Duka nga PAA, Nard Ndoka nga PDK, Mesila Doda nga PDIU, etj.
Pas takimit, Shehi tha se Basha dhe Presidenca, do të dalin me një deklaratë, për të zbardhur detajet e takimit.
“Presidenca do të dalë vetë më një deklaratë të saj. Kjo është punë e gjatë shumë. Edhe zoti Basha do të mbajë një deklaratë më vonë, pasi të mbarojë takimin me ministrin e Jashtëm të Suedisë. Më mirë me ato letrat zyrtare që të mos bëhet rrëmujë”, tha Shehi.
Gjatë takimit ra në sy mungesa e kryetares së LSI, Monika Kryemadhi.
Në ftesën që Meta u dërgoi tre ditë më parë krerëve të partive opozitare thuhej: “Nisur nga situata dramatike, në të cilën ndodhet vendi dhe pasojat e saj të papranueshme, ju ftoj juve dhe të gjithë kryetarët e Partive të Opozitës së Bashkuar në një takim, në një kohë sa më të shpejt.”
