Kryeministri i Shqipërisë, Edi Rama, ndodhet në Greqi, në kuadër të forumit BE-Liga Arabe.
Gjatë vizitës së tij në shtetin fqinj, ai është takuar edhe me homologun grek, Kyriakos Mitsotakis, ku ka diskutuar çështjet e mbetura pezull mes dy vendeve, si pronat e minoritetit grek, marrëveshja e detit dhe heqja e ligjit të luftës.
Në një intervistë për ‘Euronews’, Rama është pyetur edhe për vrasjen e Kostandinos Kacifas në Bularat të Gjirokastrës, nga forca RENEA.
Numri një i qeverisë shqiptare është shprehur se Kacifas ishte një person i rrezikshëm, shkruan ‘Balkanweb’.
“Kam besuar dhe besoj se dikush që lëviz me armë dhe kërcënon njerëzit është i rrezikshëm”, tha Rama.
Më tej ai është pyetur për mundësinë e një konflikti të vazhdueshëm mes dy komuniteteve, pas vrasjes së Kacifas.
Kryeministri shqiptar është përgjigjur se në zemrat e komuniteteve nuk ka urrejtje, përsa kohë, politika nuk fut hundët dhe nuk përpiqet ta ushqejë këtë ndjenjë.
“Unë nuk mendoj, përkundrazi besoj se historia e të dy komuniteteve tregon që, nëse politika nuk ndërhyn, ato janë një. Prandaj, nuk ka ndarje ose urrejtje në zemrat e komuniteteve, ku shqiptarët dhe grekët kanë jetuar bashkë për shumë vite. Ata janë një shembull i ndritshëm se si politika duhet të merret me faktin se ne jemi fqinj dhe jemi “të mallkuar” për të jetuar bashkë dhe për ta dashur njëri-tjetrin. Kështu që, nëse politika nuk fut hundët dhe nuk përpiqet të ushqejë urrejtje, asgjë e keqe nuk mund të ndodhë”, ka deklaruar Rama.
