Ditën e djeshme Prokuroria i kërkoi Komisionit Qëndror të Zgjedhjeve, t’i heqë mandatin kryebashkiakut të Vorës, Agim Kajmakut.
Gjithashtu Njësia e Dekriminalizimit ka nisur një hetim ndaj tij, pasi rezulton se ka fshehur hetimin nga autoritetet greke, shkruan “Dosja.al”.
Mësohet se Kajmaku është në hetim për falsifikim vulash, stampash dhe formularësh, vepër penale që sanksionohet me 4 vite burg.
Ndërkohë një ditë më parë, kryebashkiaku i Vorës i dërgoi letër Prokurores së Përkohshme, Arta Marku, ku theksonte se dënimin e kishte mësuar nga mediat, pasi ishte zgjedhur në detyrë.
Kujtojmë këtu se një ditë më parë, Interpoli solli dokumentet, që vërtetonin se Kajmaku është i njëjti person me Jorgo Toton, i cili është arrestuar në Greqi më 13 janar të vitit 2003.
Kajmaku ka mohuar akuzat, ndërsa PD ka kërkuar largimin e tij, pasi preket nga ligji i dekriminalizimit.
