Tirana prej muajsh po vuan mungesën e furnizimit me ujë të pijshëm.
Edhe Gjatë ditës së sotme do të ketë kufizime në disa zona të Tiranës.
Sipas Ujësjellës Kanalizime Tiranë, shkak për ndërprerjen e ujit janë bërë turbullirat në ujëmbledhësin e Bovillës.
Ky i fundit është destabilizuar, si pasojë e reshjeve me intensitet të lartë deri në 115 mm.
UKT sqaron se furnizimi me ujë do të rinisë në orët e mbrëmjes.
Njoftimi i UKT
Ujësjellësi i Tiranës njofton qytetarët se gjatë ditës së sotme do të ketë kufizime të pjesshme të furnizimit me ujë në disa zona të Tiranës. Shkak për këtë është bërë turbullira në ujëmbledhësin e Bovillës, si pasojë e reshjeve të dendura që kanë rënë gjatë natës.
Thatësira prej më shumë se pesë muajsh dhe intensiteti i lartë i reshjeve prej 115 mm, kanë shkaktuar këtë gjendje në ujëmbledhësin, prej të cilit furnizohet me ujë një pjesë e mirë e qytetit.
Në këto kushte, deri në stabilizimin dhe kthjellimin në ujëmbledhës, Ujësjellësi Tiranë u kërkon qytetarëve të tregojnë kujdes me përdorimin e ujit të pijshëm gjatë ditës së sotme.
Sipas inxhinierëve dhe specialistëve tanë në terren, furnizimi normal me ujë do të rinisë në orët e mbrëmjes.
Kërkojmë mirëkuptimin e qytetarëve deri në stabilizimin e situatës së furnizmit me ujë.
Në periudhën që Tirana po vuan me furnizimin me ujë të pijshëm, UKT ka nisur verifikimin dhe kolaudimin e matësave, të cilët do të blihen nga qytetarët.
