Vuçiç pranon humbjen, Lista Studentore fiton zgjedhjet në Serbi

Presidenti i Serbisë, Aleksandar Vuçiç, ka pranuar humbjen e listës së tij në zgjedhjet e parakohshme parlamentare të 25 tetorit, duke deklaruar se rezultatet paraprake tregojnë një epërsi të qartë të Listës Studentore.

Në një deklaratë drejtuar qytetarëve, Vuçiç bëri të ditur se, bazuar në një kampion të stratifikuar votash, lista e mbështetur nga studentët dhe pjesëmarrësit në bllokada pritet të sigurojë 135 deri në 140 mandate në parlament, ndërsa lista e tij rreth 105 mandate.

“Dua t’ju informoj se, bazuar në kampionin e stratifikuar, është e qartë se i humbëm këto zgjedhje. Lista e studentëve-bllokues do të ketë nga 135 deri në 140 mandate, ndërsa ne kemi rreth 105”, deklaroi Vuçiç.

Sipas përllogaritjeve që paraqiti presidenti serb, Lista Studentore ka marrë rreth 2.2 milionë vota, kundrejt 1.72 milionë votave të listës së tij.

Vuçiç sqaroi se shifrat mbeten paraprake dhe se rezultatet përfundimtare nuk janë shpallur ende zyrtarisht.

Ai foli gjithashtu për përfaqësimin e pakicave kombëtare në parlamentin e ri, duke deklaruar se hungarezët e Vojvodinës pritet të sigurojnë tre mandate, ndërsa shqiptarët një mandat.

Zgjedhjet parlamentare të 25 tetorit u zhvilluan pas një periudhe protestash të vazhdueshme kundër korrupsionit dhe pushtetit të Vuçiçit, gjatë së cilës lëvizja studentore u shndërrua në një forcë të rëndësishme politike.

Në këto zgjedhje, qytetarët serbë votuan mes 18 listave zgjedhore për të përcaktuar përbërjen e parlamentit me 250 vende.