Afera e tenderave të AKSHI-t/ Mirlinda Karçanaj paraqitet në SPAK

Ish-drejtoresha e Agjencisë Kombëtare të Shoqërisë së Informacionit, Mirlinda Karçanaj, është paraqitur këtë të martë në Prokurorinë e Posaçme, në zbatim të masës së sigurisë “detyrim paraqitje”.

Karçanaj, e cila është nën hetim në dosjen e tenderave të AKSHI-t, ka hyrë e vetme në ambientet e SPAK. Paraqitja e saj lidhet me masën e vendosur nga Gjykata e Lartë, sipas së cilës ajo duhet të paraqitet pranë policisë gjyqësore të martën e parë dhe të tretë të çdo muaji, në orën 10:00.

Ish-drejtoresha e AKSHI-t ndodhej më herët në “arrest shtëpie”, masë e vendosur në dhjetor 2025. Më 7 maj 2026, Gjykata e Lartë e zbuti masën, duke vendosur ndaj saj “detyrim paraqitje” dhe “ndalim të daljes jashtë shtetit”.

Karçanaj është një prej personave të përfshirë në dosjen e SPAK për tenderat e AKSHI-t. Hetimet lidhen me dyshimet për ndërhyrje në procedurat e prokurimit, favorizim të kompanive të caktuara dhe pengim të konkurrencës mes operatorëve ekonomikë.

Në dosje janë përfshirë edhe Ergys Agasi, Ermal Beqiri, Hava Delibashi, Erion Ismaili, Andis Papa, Gëzim Hoxha dhe Rogers Rryta. Në fazën fillestare të hetimit, për Agasin dhe Beqirin u caktua masa “arrest me burg”, ndërsa ndaj Karçanajt ishte vendosur “arrest në shtëpi”.

Çështja përfshin akuza për vepra penale si shkelja e barazisë së pjesëmarrësve në tendera, grupi i strukturuar kriminal, konkurrenca e paligjshme nëpërmjet dhunës, heqja e paligjshme e lirisë dhe pastrimi i parave. Për Karçanajn, në veçanti, janë raportuar akuzat për “Shkelje e barazisë së pjesëmarrësve në tendera apo ankande publike”, në formën e grupit të strukturuar kriminal, si dhe “Grup i strukturuar kriminal”.

Hetimi për AKSHI-n u bë publik në dhjetor 2025, kur agjentët e Byrosë Kombëtare të Hetimit kryen kontrolle në kuadër të procedimit. Në qendër të dosjes janë procedurat e prokurimit të institucionit dhe dyshimet e SPAK për mënyrën se si janë favorizuar operatorë të caktuar ekonomikë.

Karçanaj vijon të jetë nën masat “detyrim paraqitje” dhe “ndalim i daljes jashtë shtetit”, ndërsa hetimet për dosjen e AKSHI-t vazhdojnë.

Çdo person i përfshirë në procedim prezumohet i pafajshëm derisa fajësia të provohet me vendim gjyqësor të formës së prerë.