FUND I NJË EPOKE/ Lionel Messi tërhiqet nga Argjentina pas 20 vitesh: “Tani do të jem një prej jush”

Lionel Messi i jep fund një prej kapitujve më të mëdhenj në historinë e futbollit. Kapiteni legjendar ka njoftuar tërheqjen nga Kombëtarja e Argjentinës, duke mbyllur një rrugëtim prej më shumë se dy dekadash me fanellën “Albiceleste”. Vendimi vjen pas finales së Botërorit 2026 dhe pak javë pas humbjes së babait të tij, Jorge Messi.

Në një mesazh emocional, 39-vjeçari tregon se vendimin e kishte marrë pas shumë reflektimesh dhe pranon se largimi nga përfaqësuesja është një prej vendimeve më të dhimbshme të karrierës së tij.

“Pas gjithë kësaj kohe që nga finalja dhe pasi e kam menduar shumë, dua t’ju njoftoj të gjithëve se po tërhiqem nga Kombëtarja”, shkruan Messi.

“Ka qenë një vendim që më ka dhembur dhe ende më dhemb thellë brenda meje, por e kuptoj se ky është momenti i duhur.”

Messi thekson se gjatë gjithë rrugëtimit të tij me Argjentinën ka dhënë gjithçka për fanellën, jo vetëm gjatë periudhës së fundit të mbushur me trofe, por edhe në vitet më të vështira.

“Betohem se gjithmonë kam dhënë gjithçka, jo vetëm në këto vitet e fundit kur fituam gjithçka, por edhe më parë. Gjithmonë kam luftuar dhe kam dhënë gjithçka për këtë fanellë, për t’ju sjellë lumturi dhe për t’ju bërë krenarë që jeni argjentinas përmes futbollit”, shprehet ai.

Kapiteni pranon se koha po kalon dhe se tashmë ka ardhur momenti për t’i hapur rrugën brezit të ri.

“Nuk ka mbetur shumë kohë dhe kapituj të ndryshëm po mbyllen. Ky është një kapitull që më dhemb shumë. E dua, e kam dashur dhe do ta dua gjithmonë të qenit pjesë e Kombëtares. Kam dhënë gjithçka që kisha dhe nuk kam më shumë për të dhënë.”

“Ka edhe shumë lojtarë të rinj dhe të talentuar që po vijnë dhe që e meritojnë të jenë këtu.”

“Tani do të jem një prej jush”

Një pjesë të veçantë të mesazhit Messi ia kushton tifozëve që e kanë shoqëruar përgjatë 20 viteve të tij me përfaqësuesen.

“Faleminderit për gjithë dashurinë gjatë këtyre 20 viteve. Do të më mungojë t’ju dëgjoj nga brenda. Tani do të jem një prej jush, gjithmonë duke mbështetur nga jashtë, në momentet e mira dhe akoma më shumë në ato të këqija.”

Ai falënderon gjithashtu familjen, trajnerët, shokët e skuadrës dhe drejtuesit që kanë qenë pjesë e rrugëtimit të tij.

“Faleminderit familjes sime që ka qenë gjithmonë aty për mua dhe që më ka shoqëruar gjatë këtij rrugëtimi të bukur, por edhe të vështirë. Faleminderit çdo trajneri, shoku skuadre dhe drejtuesi me të cilët pata mundësinë ta ndaj këtë përvojë. Me vete marr kujtime dhe momente të paharrueshme.”

Messi largohet nga Argjentina si një prej figurave më të mëdha të historisë së saj, pasi udhëhoqi kombëtaren drejt triumfit në Kupën e Botës 2022 dhe dy titujve të Copa América. Në Botërorin 2026, Argjentina arriti sërish deri në finale, ku përfundoi nënkampione.

“Largohem i qetë dhe krenar, duke e ditur se së bashku me shokët e skuadrës ju dhamë momente që dikur i kishim ëndërruar. Ishte çmenduri ta përjetoja gjithë këtë me ju. Ju dua!”

“Faleminderit Zotit që më bëri argjentinas. Vamos Argentina!”

Në fund të mesazhit, Messi zbulon edhe një detaj domethënës: fjalët e lamtumirës i kishte shkruar që më 21 korrik, vetëm dy ditë pas finales së Botërorit, por humbja e babait të tij, Jorge Messi, e kishte bindur edhe më shumë për vendimin. Jorge Messi ndërroi jetë më 8 gusht, në moshën 68-vjeçare.

“I shkrova këto fjalë më 21 korrik, dy ditë pas finales. Sot, pas asaj që ndodhi me babain tim, jam edhe më i bindur për këtë vendim sesa më parë.”

Kështu mbyllet epoka e Lionel Messit me Argjentinën: më shumë se 20 vite me fanellën bardhekaltër dhe një histori që kulmoi me trofetë që për vite të tëra i kishin munguar karrierës së tij të jashtëzakonshme.