Rama përplaset me ministren për “superkompaninë” e barnave, shtatori mund të vendosë jo vetëm fatin e Salës, por edhe të gjithë sistemit të furnizimit në shëndetësi

Një projektligj i ri i qeverisë, që synon krijimin e një shoqërie aksionare 100% shtetërore për administrimin e barnave dhe pajisjeve mjekësore, po kthehet në një nga çështjet më të nxehta brenda mazhorancës.

Sipas informacioneve të publikuara, ministrja e Shëndetësisë, Evis Sala, ka refuzuar të firmosë draftin në formën aktuale, ndërsa kryeministri Edi Rama i ka lënë afat deri në muajin shtator për ta finalizuar. Nëse kjo nuk ndodh, largimi i saj nga detyra po përflitet si një mundësi e pakthyeshme.

Por debati nuk lidhet vetëm me fatin politik të ministres.

Nëse ky projektligj miratohet, një kompani e vetme shtetërore do të planifikojë, blejë, importojë, magazinojë, transportojë dhe shpërndajë barna e pajisje mjekësore për të gjithë sistemin publik. Praktikisht, një pjesë shumë e madhe e furnizimit të shëndetësisë do të përqendrohet në një strukturë të vetme.

Megjithatë, drafti parashikon edhe diçka tjetër me rëndësi. Kjo kompani nuk do të kufizohet vetëm në furnizimin e institucioneve publike. Ajo do të ketë të drejtë të krijojë partneritete me sektorin privat, të marrë pjesë në kompani të tjera, të zhvillojë projekte të përbashkëta dhe aktivitete të tjera ekonomike në këtë sektor.

Pikërisht këtu lind pyetja që kërkon përgjigje: kush do të jenë partnerët privatë të kësaj “superkompanie”?

Në tregun shqiptar të shëndetësisë veprojnë disa operatorë të mëdhenj privatë. Përmendim këtu Klodian Allajbeun, i cili përmes kompanive të lidhura me të ka ndërtuar prej vitesh një prani të konsiderueshme në spitale private, laboratorë, dializë dhe pajisje mjekësore. Pra, Allajbeu si “garantor” mund të lidhet me këtë projektligj dhe mund të jetë partner i kësaj strukture.

Debati bëhet edhe më i ndjeshëm për shkak se sektori i koncesioneve në shëndetësi është aktualisht nën vëmendjen e SPAK-ut. Hetimet për disa kontrata dhe kontrollet e zhvilluara në kuadër të tyre kanë rritur interesin publik për çdo reformë që prek miliarda lekë fonde publike në këtë sektor.

Prandaj, shtatori mund të jetë një muaj vendimtar.

A do të bindet ministrja të firmosë draftin nëse ai mbetet në formën aktuale? Apo projektligji do të detyrohet të ndryshojë pas kundërshtimeve që janë raportuar?

Po aq e rëndësishme është edhe një pyetje tjetër: nëse kjo “superkompani” do të krijojë partneritete me privatët, mbi çfarë kriteresh do të përzgjidhen ata dhe si do të garantohet konkurrenca e ndershme?

Qeveria ende nuk e ka bërë publik draftin për konsultim dhe nuk ka dhënë shpjegime zyrtare për mosmarrëveshjet e raportuara. Deri atëherë, mbetet një kërkesë e vetme: transparencë e plotë. Sepse kur bëhet fjalë për barnat, pajisjet mjekësore dhe miliarda lekë para publike, qytetarët kanë të drejtë të dinë jo vetëm se çfarë po ndryshon, por edhe kush do të marrë vendimet dhe me kë do të bashkëpunojë shteti.