Ish-deputeti Myslym Murrizi ka lëshuar akuza të forta ndaj qeverisë, kryeministrit Edi Rama, drejtuesve të institucioneve të sigurisë dhe projektit të investimit në Zvërnec, duke pretenduar se pas këtij projekti qëndron vetë qeveria shqiptare.
I ftuar në MCN TV, Murrizi deklaroi se “investitori i vërtetë në Zvërnec është qeveria”, ndërsa pretendoi se paratë e përdorura në investimet strategjike vijnë nga zyrtarë të korruptuar të pushtetit.
Ai hodhi gjithashtu akuza ndaj drejtueses së SHISH, duke deklaruar se ekzistojnë “dhjetëra foto dhe video” që sipas tij tregojnë se ajo jepte llogari te Ergys Agasi.
“Ka me dhjetëra video e foto të printuara që jepnin llogari bashkë me drejtues madhorë të policisë para se të shpallej në kërkim. Dorëzimi i shërbimit tek një njeri jo shtetas shqiptar në kundërshtim me ligjin dhe aq më tepër i shkarkuar nga gjysma tjetër e kombit, vetëm një arrogant si Rama dhe njeri i papërgjegjshëm mund ta bëjë”, u shpreh Murrizi.
Duke folur për protestat qytetare, ai tha se ato nuk lidhen më vetëm me çështjen e Zvërnecit, por përfaqësojnë, sipas tij, revoltën e akumuluar të qytetarëve ndaj qeverisë.
“Protesta ka zgjuar nervin qytetar. Ka dalë Tirana në shesh, jo rrethe të thirrura nga PD. Rama është lakuriq para çdo kancelarie të Perëndimit që nuk është më ky i shumëvotuari, ky i 84 mandateve. E ka treguar hapur që i ka blerë mandatet”, deklaroi Murrizi.
Në fund, ish-deputeti kërkoi që SPAK të nisë hetime ndaj kryeministrit, duke pretenduar se Prokuroria e Posaçme nuk po guxon ta regjistrojë Ramën si person nën hetim.
“SPAK duhet ta thërrasë Ramën nën hetim. SPAK nuk guxon t’ia regjistrojë emrin si person në hetim”, tha ai.
