Janë zbardhur detaje të reja nga ngjarja e rëndë që tronditi Tiranën, ku pas më shumë se dy javësh kërkime është identifikuar trupi i pajetë i 34-vjeçarit Eglant Koçi.
Trupi i Koçit u gjet një ditë më parë në fshatin Cerrujë, në një zonë malore pranë kufirit mes Tiranës dhe Elbasanit. Pas gjetjes së kufomës, familjarët kanë bërë identifikimin e viktimës, duke konfirmuar se bëhet fjalë për të riun që rezultonte i zhdukur prej fillimit të muajit qershor.
Burime nga hetimi bëjnë me dije se gjatë këqyrjes së trupit është konstatuar një plagë në pjesën e pasme të kokës, e dyshuar si e shkaktuar nga armë zjarri. Ky detaj forcon dyshimet e hetuesve se 34-vjeçari është ekzekutuar dhe më pas trupi i tij është fshehur në zonën ku u gjet.
Trupi i pajetë është transportuar në morg, ku do t’i nënshtrohet ekspertizës mjeko-ligjore për të përcaktuar shkakun e saktë të vdekjes dhe rrethanat e krimit.
Për ngjarjen është shpallur në kërkim Armand Shakaj, mik i viktimës dhe personi që policia dyshon se ka rol kryesor në rrëmbimin dhe vrasjen e Koçit. Ndërkohë, hetimet vijojnë edhe për persona të tjerë që mund të kenë ndihmuar në fshehjen e krimit.
Eglant Koçi u raportua i zhdukur rreth dy javë më parë. Ai ishte parë për herë të fundit në Tiranë, ndërsa kërkimet intensive të policisë çuan fillimisht në gjetjen e motorit të tij dhe më pas në zbulimin e trupit të pajetë, duke i dhënë një fund tragjik misterit të zhdukjes së 34-vjeçarit.
